यसदिन कारोबार भएका ९ वटा समूहको सूचकमध्ये नेपाल टेलिकमको वर्चस्व रहेको अन्य समूहको परिसूचक बाहेक सबै समूहका परिसूचक राताम्मे भएका छन् । सबैभन्दा बढी बीमा समूहको परिसूचक २९.२५ अंकले ओरालो लागेको छ भने अन्य समूहको परिसूचक २.८९ अंकले उकालो लागेको छ ।
यसैगरी, होटेल समूह २०.८७ अंक, हाईड्रोपावर १३.७७ अंक, व्यापार ११.५७ अंक, माईक्रोफाइनान्स १०.७६ अंक, वाणिज्य बैंक समूह ७ अंक, विकास बैंक ५.२७ अंक र फाइनान्स ४.२३ अैकले ओरालो लागेका छन् ।
सोमबारको बजारमा १६१ कम्पनीको ११ लाख ५२ हजार ५४० कित्ता सेयर ३९ करोड ७७ लाख २२ हजार रुपैयाँ बराबरको सेयर खरिद विक्री भएका छन् । कारोेबार रकममा आईतबारको तुलनामा ६ करोड रुपैयाँले कमी आएको छ । अल्पकालिन कारोबारीहरु बजार अझ घट्छ भन्ने पर्खाईमा बस्दा र नयाँ लागानीकर्ता समेत बजारमा प्रवेश गर्ने नसक्दा कारोबार रकम र नेप्से दुबै घट्न पुगेको अनुमान गर्न सकिन्छ ।
बजार घटेपनि चार सय प्रतिशत हकप्रद बिक्री गर्न धितोपत्र बोर्डबाट अनुमति पाएका कारण ग्रीन डेभलपमेन्ट बैंकका लगानीकर्ताले करिब १० प्रतिशत तथा अरुण फाइनान्सका सेयरधनीले ७.२८ प्रतिशतले कमाएका छन् ।
उता नेपाल हाईड्रो डेभलपर कम्पनीका लगानीकर्ताले ९ प्रतिशत, सिर्जना फाइनान्स कम्पनी ७.५३, बिशालबजार कम्पनी ६.७७ र हिमालयन जनरल इन्स्योरेन्स कम्पनीको सेयरमूलय ६.३८ प्रतिशतले घटेको छ ।
सोमबार एभरेष्ट बैंकको सबैभन्दा बढी २ करोड ६७ लाख रुपैयाँभन्दा बढीको कारोबार भएको छ । यसैगरी, कारोबार रकमकै आधारमा दोस्रो र तेस्रो स्थानमा क्रमशः सिभिल बैंक र स्टाण्डर्ड चार्टर्ड बैंकको दुई करोड ५३ लाख तथा एक करोड ७८ लाख रुपैयाँको सेयर कारोबार भएको छ ।