लघुवित्त कम्पनीको सेयर विक्री प्रबन्धक सिभिल क्यापिटलले दिएको जानकारी अनुसार लिलामी सेयरको कटअफ २२५० रुपैयाँ कायम भएको छ । साधारण सेयरका लागि ४७ जना आवेदकले शिलबन्दी बोलपत्र पेश गरेकोमा जम्मा २ जनाले मात्र सेयर प्राप्त गरेका छन् । साधारण सेयरका लागि अधिकतम २३५१ रुपैयाँसम्मको आवेदन परेको थियो ।
किसान माइक्रोफाइनान्स कम्पनीले असोज ४ गतेदेखि कात्तिक ७ गतेसम्म २४.२२ प्रतिशत हकप्रद जारी गर्दा अवितरित भएको एक हजार ३५१ कित्ता सेयर लिलामीमा ल्याएको थियो ।
हकप्रद जारीपश्चात किसानको चुक्ता पूँजी चार करोड रुपैयाँ पुगेको छ । गत आर्थिक बर्षको नाफाबाट कम्पनीले २५ प्रतिशत बोनस वितरण गर्ने घोषणा गरेको छ । बोनसपछि पूँजी चार करोड ८० लाख रुपैयाँ पुग्नेछ ।
चालू आवको प्रथम त्रैमासमा कम्पनीले १२ लाख ११ हजार रुपैयाँ खुद नाफा कमाएर प्रतिसेयर आम्दानी १५ रुपैयाँ पाँच पैसा कायम गरेको छ । लघुवित्तको सेयर विहीबार प्रतिकित्ता २३०० रुपैयाँमा कारोबार भएको छ ।