तरलता संकटका बाबजुत बैंकले तेस्रो त्रैमासमा खुद नाफामा १९ प्रतिशतले सुधार गरेर दुई अर्ब ८३ करोड रूपैयाँ कमाएको छ । बैंकले ९४ प्रतिशतले बढेको ब्याजखर्च, ३४ प्रतिशतले बढेको कर्मचारी खर्च तथा खराब कर्जामा देखिएको ५३ प्रतिशत बढी नोक्सानी व्यवस्थाको बाबजुत उक्त नाफा आर्जन गरेको हो ।
गत बर्षको तेस्रो त्रैमासमा पनि बैंकले २० प्रतिशतले खुद नाफा बढाएर दुई अर्ब ३७ करोड नाफा आर्जन गरेको थियो । चालू आवकाे तेस्राे त्रैमासमा गत बर्षको तुलनामा १९.३८ प्रतिशतले खुद नाफा बढाउँदै बैंकले आफ्नो प्रतिको रफ्तारलाई कायम नै राखेको छ ।
एस डेभलपमेन्ट बैंकलाई आफुमा विलय गराएको बैंकले चुक्ता पूँजी घटेसँगै प्रतिसेयर आम्दानी ह्रास हुन्छ भन्ने मान्यतालाई समेत गलत साबित गरेको छ । निजी क्षेत्रको सबैभन्दा धेरै चुक्ता पूँजी रहेर पनि बैंकले प्रतिसेयर आम्दानी बार्षिक ३५ रुपैयाँ ६० पैसा कायम गरेको छ । एस डेभलपमेन्ट बैंकलाई एक्वायर गरेर बैंकले ९ अर्ब ९५ करोड रुपैयाँको जगेडा कोष बनाएको छ ।
एक खर्ब ३० अर्ब निक्षेप संकलन गरेर बैंकले एक खर्ब १८ अर्ब कर्जा तथा लगानी गरेको छ । निक्षेप संकलन एनआइसी एशिया बैंक भन्दा ३ करोड कम संकलन गरेपनि र कर्जाको आधारमा पनि बैंकले १० करोड बढी प्रवाह गरेको देखिन्छ ।
ब्याज आम्दानी, सञ्चालन मुनाफा तथा वैदेशिक मुद्राको कारोबारको बृद्धि नै उसको खुद नाफामा बढोत्तरीको मुख्य कारण देखिएको छ । बैंकको खराब कर्जा अघिल्लो बर्षको तुलनामा सामान्य बढेपनि एक प्रतिशत भन्दा कम नै रहेको छ । यसअवधिमा बैंकको कर्जा निक्षेप अनुपात बढेर ७८ प्रतिशत पुगेकाे छ भने खराब कर्जा ०.७६, निक्षेप लागत ६.३५, अाधार ब्याजदर ९.१२, र मूल्य अाम्दानी अनुपात १८.७४ प्रतिशत रहेको छ ।
