अघिल्लो आर्थिक वर्षको तुलनामा कम्पनीको खुद नाफा चार करोड ४४ लाख रुपैयाँले बढेको हो । यस अवधिमा कम्पनीले विद्युत बिक्रीबाट ६६ करोड ७२ लाख रुपैयाँ आम्दानी गरेको छ ।
अघिल्लो आर्थिक वर्षको यसै अवधिमा अवधिमा ६६ करोड २८ लाख रुपैयाँ आम्दानी गरेको थियो । अरु कम्पनीबाट लाभांश तथा अन्य स्रोतबाट पाँच करोड ६२ लाख २१ हजार रुपैयाँ आम्दानी गरेको छ ।
दुई अर्ब २१ करोड चुक्ता पूँजी रहेको कम्पनीको जगेडा कोष ७३ प्रतिशतले बढेको छ ।
एफपिओ बिक्रीबाट संकलित प्रिमियमका कारण जगेडा कोषको आकार धेरै बढेको हो ।
अघिल्लो आर्थिक वर्षमा २ अर्ब ५८ करोड रहेको जगेडा कोष गत आर्थिक वर्षमा ४ अर्ब ४७ करोड ७० लाख रुपैयाँको बनेको छ ।
कम्पनीको प्रतिसेयर आम्दानी ३२ रुपैयाँ ११ पैसामा झरेको छ । गत वर्षको सोही अवधिमा उसको प्रतिसेयर आम्दानी ३६ रुपैयाँ ९० पैसा थियो । कम्पनीको प्रतिसेयर नेटवर्थ ३०१ रुपैयाँ ३४ पैसा र मूल्य आम्दानी अनुपात १४.२३ गुणा बढी छ ।
अहिले हिमाल पावरले सञ्चालन गरिरहेको ६० मेगावाट क्षमताको खिम्ती जलविद्युत आयोजनामा बीपीसीको १७ प्रतिशत स्वामित्व छ । उक्त आयोजनाबाट बीपीसीले पछिल्ला २ आर्थिक वर्षमा ५४ करोडको औसतमा लाभांश खाई रहेको छ । उल्लेखित लाभांश खाएर पछिल्ला २ आर्थिक वर्षमा कम्पनीले औसतमा ६० करोड खुद नाफा कमाउँदै आएकोमा गत आर्थिक वर्षमा पनि त्यसले निरन्तरता पाएको हो ।
दुई वर्षपछि खिम्तीले विद्युत उत्पादन थालेको २० वर्ष पुग्छ । प्राधिकरणसँगको सम्झौता अनुसार सोही मितिबाट पीपीए समाप्त हुनुका साथै आयोजनाको ५० प्रतिशत स्वामित्व हिमाल पावरबाट विद्युत प्राधिकरणमा जानेछ ।
त्यसपछि विद्युत प्राधिकरणले ५ रुपैयाँ महङ्गो मूल्यमा खिम्तीको बिजुली किन्ने छैन । अहिले विद्युत प्राधिकरणले रोयल्टी सहित झण्डै १३ रुपैयाँ प्रतियुनिटको दरमा खिम्तीको बिजुली किन्दै आएको छ । आयोजनामा बीपीसीको स्वामित्व १७ प्रतिशतबाट साढे ८ प्रतिशतमा झर्नेछ ।
