गएको साताको पछिल्लो चार दिन लगातार बढेको शेयर बजारमा यो साताको पहिलो दिन आइतबार दोहोरो अंकको गिरावट आएको छ । कारोबारमा आएका सबै समूह राताम्मे बनेपछि नेप्से सूचक फेरि १२ सय अंक मुनी झरेको छ ।

निरन्तर घटेर लगानीकर्तालाई निराश बनाएको बजारमा फेरिपनि नाफा सुरक्षित गर्ने होडबाजी चल्दा बजारले नकारात्मक बाटो समातेको छ । गएको साता बजार बढ्नु भन्दा पहिला शेयर खरिद गर्नेहरुले नाफा सुरक्षित गर्दा बजार घटेको आंकलन गरिएको छ । जसले गर्दा कारोबार समेत केही घटेको छ ।

गत साताको आइतबार बाहेक चारै दिन शेयर बजार बढेको थियो । चार दिनको बीचमा नेप्से ४६.३८ अंकले उकालो लागेको थियो । अस्थिर बजारमा सामान्य नाफा आएको अवस्थामा अल्पकालीन कारोबार गर्नेहरु नाफा सुरक्षित गर्न हतारिने गरेका छन् । यसले गर्दा बिक्री चाप पर्दा बजार खस्कने गरेको छ । 

गत बर्षको वित्तीय विवरण सार्वजनिक भईसकेको र लाभांश घोषणा गर्ने क्रम चल्दै गर्दा कम्पनीलेहरुले बोनश भन्दा पनि नगदमा जोड दिएपछि लगानीकर्ताहरु बजारप्रति त्यत्ती आशावादी हुन सकेका छैनन् । अर्कातर्फ चुक्ता पूँजी पुगेको अवस्थामा नयाँ मोडलमा वित्तीय विवरण सार्वजनिक गरेका वाणिज्य बैंकहरुले दिने लाभांश के कस्तो हुने भन्ने दुविधा पनि लगानीकर्तामा रहेको छ ।

बजार खुलेदेखि नै घट्न थालेको नेप्से आइतबार १४.०३ अंकले घटेर ११९६.२९ अंकमा आईपुगेको छ । कूल १६० कम्पनीका कारोबार भएको बजारमा ३२ करोड ५२ लाख बराबरको कारोबार भयो । कारोबार रकम गत विहीबारको तुलनामा १३ करोड कम हो ।

यसदिन कारोबारमा आएका सबै समूहका सूचक राताम्मे रहे । सबैभन्दा धेरै ग्रामिण विकास बैंकको ३ करोड ४५ लाख बराबरको कारोबार भयो । बैंकले ५० प्रतिशत हकप्रद प्रस्ताव गरेपछि शेयर मूल्य घटेर कारोबार बढ्न थालेको छ ।

यसदिन सबैभन्दा धेरै खानीखोला हाइड्रोका लगानीकर्ताले पाँच प्रतिशत बढी कमाए । नगबेली लघुवित्त, आर्इसिएफसी फाइनान्स, शाईन रेसुङ्गा तथा लुम्बिनी विकास लगायतको शेयरमूल्य धेरै घटेको छ ।