अर्थमन्त्रालयमा मंगलबार आयोजित पत्रकार भेटघाटका क्रममा अर्थमन्त्री डा. युवराज खतिवडाले साउन र भदौमा एक खर्ब २० अर्ब राजश्व संकलन भएको जानकारी दिए । साथै उनले राजस्व संकलनका लागि सरकारले करको दायरा बढाउने नीति लिएको पनि स्पष्ट पारे।
अर्थमन्त्रीका अनुसार दुई महिनामा एक खर्ब ३ अर्ब बजेट खर्च भएको छ । यसअवधिमा चालुतर्फ ९६ अर्ब रुपैयाँ तथा पूँजीगत खर्च ७ अर्ब रुपैयाँ रहेको छ । अर्थमन्त्री खतिवडाले अघिल्लो आर्थिक बर्षको तुलनामा चालु बर्षको यस अवधिमा पूँजीगत खर्चमा सुधार आएको बताए । प्रदेशमा भएको खर्चको तथ्यांक प्राप्त नभएकाले खर्चको एकिन नभईसकेको उनको भनाई छ ।
करको दायरा बढाउने र करमैंत्री कार्यालयको स्थापना गरेर राजश्व संकलनको कामलाई सहज बनाउने काम सरकारले गरिरहेको बताउदै अर्थमन्त्री खतिवडाले सरकारले कर असुलीलाई सहज बनाउन ११ वटा थप कर कार्यालय स्थापना गरेको जानकारी दिए ।
साथै उनले स्थानीय तहमा देखिएको कर सम्बन्धि समस्या समेत समाधान हुँदै गएको दाबी गरे। खतिवडाले कानुन विपरित कर नलिन आवश्यक व्यवस्था गरिएको पनि पत्रकार सम्मलेनमा स्पष्ट पारे।
