नेप्सेले कम्पनीकाे शेयर काराेबारका लागि केपीसीएल (KPCL) काराेबार संकेत प्रदान गरेकाे छ । यहि संकेतबाट कम्पनीकाे शेयर काराेबार सुरू भएकाे छ ।
कम्पनीको पहिलो कारोबारका लागि ९५ रुपैयाँ ८४ पैसादेखि २८७ रुपैयाँ ५३ पैसासम्मको रेञ्ज दिएको छ । यहि रेञ्जबाट कम्पनीको शेयर कारोबार सुरु भएकाे छ । कम्पनीकाे पहिलाे शेयर काराेबार प्रतिकित्ता ११० रूपैयाँबाट थालनी भएकाेमा समाचार तयार पार्दासम्म बढेर १२१ रूपैयाँसम्म पुगेकाे छ ।
धितोपत्र बोर्डको पछिल्लो व्यवस्था अनुसार कुनै पनि कम्पनीले शेयर बाँडफाँड गरेको एक सातापछि कारोबार सुरु गर्नसक्ने व्यवस्था रहेको छ । कालिका पावर कम्पनीले शेयर बाँडफाँडको १५ दिनपश्चात कारोबार सुरु गरेको हो ।
कम्पनीले काठमाडौं क्यापिटल मार्केट लिमिटेड र ग्लोबल आइएमई क्यापिटलको बिक्री प्रबन्धकत्वमा भदौ २८ गतेदेखि असोज १ गतेसम्म २० प्रतिशत बराबरको १२ करोड रुपैयाँ बराबरको १२ लाख कित्ता आईपिओ निष्काशन गरेर असोज १० गते बाँडफाँड गरेको थियो ।
यसअघि कालिकाले गत माघ २१ देखि आयोजना प्रभावित गोरखाका स्थानीयबासिन्दालाई १० प्रतिशत अर्थात ६ करोड रुपैयाँ बराबरको ६ लाख कित्ता आईपिओ निष्कासन गरेको थियो । साधारण सेयर जारी गरेपछि कम्पनकिो चुक्ता पूँजी ६० करोड रुपैयाँ पुग्नेछ ।
कम्पनीले गोरखामा ६ मेगावाट क्षमताको दरौदी ए जलविद्युत आयोजना निर्माण गरी हाल सञ्चालनमा ल्याएको छ । निजी क्षेत्रको कालिका ग्रुपबाट प्रवद्र्धित आयोजनाको उत्पादन लागत प्रतिमेगावाट २३ करोड १० लाख रुपैयाँ छ । आयोजनाको कुल लागत एक अर्ब ३८ करोड ६२ लाख रुपैयाँ रहेको छ ।
कम्पनीको अध्यक्ष तथा प्रबन्धक निर्देशकमा पूर्वमन्त्री एवं निमार्ण व्यवसायी बिक्रम पाण्डे रहेका छन् । आयोजनाको लगानी फिर्ता ९ वर्ष ५ महिना रहेको छ । कम्पनीले चालु आर्थिक बर्षबाट लाभांश दिनसक्ने प्रक्षेपण समेत गरेको छ ।
कम्पनीले चालू बर्षमा ३ करोड रुपैयाँ अर्थात चुक्ता पूँजीको पाँच प्रतिशत बराबरको शेयर लाभांश बाँड्ने दाबी गरेको छ । कम्पनीले प्राथमिक सेयरबाट उठेको रकम ठेकेदार र अल्पकालिन कर्जा भुक्तान गर्न प्रयोग गर्ने र केही रकम दिर्घकालिन कर्जा भुक्तानीको लागि प्रयोग गरिने बताइएको छ ।
