नेपाल इन्भेष्टर फोरम र पूँजीबजार लगानीकर्ता संघका प्रतिनिधिहरुले सोमवार धितोपत्र बोर्डका पदाधिकारीहरुसँग छलफल गरेका छन । साथै उनीहरुले अर्थमन्त्रालयले गठन गरेको मुद्रा र पूँजी बजारको समस्या अध्ययन गर्न गठित समितिलाई बुझाउने सुझाबहरु समेत संकलन गर्न बैठकमा समेत जुटेका छन् ।
कार्यदलमा लगानीकर्ताको तर्फबाट प्रतिनिधित्व गर्नुहुने इन्भेष्टर्स फोरमका अध्यक्ष अम्बिका प्रसाद पौडेलले सबै सरोकारवालाहरुसँगको छलफलवाट आएको सुझाब कार्यदलको मंगलबार बस्ने बैठक प्रस्तुत गरिने जानकारी दिए । पौडेलले आफ्नो फेसवुक पेजमा समेत कार्यदलका लागि सल्लाह र सुझाव दिन लगानीकर्तासँग अनुरोध गरेका छन् ।
लगानीकर्ताको अर्बै पूँजी डुबिरहँदा पनि पूँजी बजारलाई कुनै महत्व नदिएको आरोप लागेपछि सरकारले गत हप्ता पूँजी बजारको बिकास र विस्तारका लागि सात दिनभित्र प्रतिबेदन पेश गर्न डेपुटी गभर्नर शिवराज श्रेष्ठको नेतृत्वमा एक कार्यदल गठन गरेको थियो । कार्यदललाई प्रतिबेदन बुझाउन ७ दिनको समय दिइएको छ ।
पूँजीबजार खस्कनुमा सिमित लगानीकर्ताको चलखेल मुख्य कारण मान्दै पूँजी बजारमा अर्वौ क्षति हुँदापनि वास्ता नगरेका अर्थमन्त्री युवराज खतिवडाले आफनै राजीनामाको माग राख्दै लगानीकर्ताहरु अनसन बस्न थालेपछि कार्यदल बनाउन बाध्य भएको टिप्पणी हुने गरेको छ ।
