नेपाल राष्ट्र बैंकको निर्देशनअनुसार नयाँ प्रणाली (एनएफआरएस) अवलम्बन गरेर वित्तीय विवरण सार्वजनिक गर्न थालिएको बैंकले जनाएका छन् । शुक्रबार प्रकाशित विवरणअनुसार एभरेष्ट बैंकले गत पुस मसान्तसम्म एक अर्ब ४२ करोड रुपैयाँ नाफा गरेको छ ।
बैंकको गत वर्षको सोही अवधिमा एक अर्ब २२ करोड नाफा गरेको थियो । गत पुस मसान्तसम्ममा बैंकले एक खर्ब २४ अर्ब रुपैयाँ निक्षेप सङकलन गरी एक खर्ब पाँच अर्ब रुपैयाँ बराबरको ऋण लगानी गरेको छ । बैंकको कर्जा निक्षेप अुनपात ७६ दशमलव २३ प्रतिशत रहेको छ ।
यस्तै माछापुच्छ्रे बैंकले शुक्रबार प्रकाशित गरेको दोस्रो त्रैमासको वित्तीय विवरणमा ६२ प्रतिशत नाफा कमाएको उल्लेख छ ।
गत पुस मसान्तसम्म ७८ करोड १३ लाख बराबरको नाफा गरेको गरेको बैंकले अघिल्लो आवको सोही अवधिमा ४८ करोड ५७ लाख नाफा गरेको थियो । बैंकले ८५ अर्ब १७ करोड निक्षेप सङ्कलन गरी रु ७४ अर्ब ६५ करोड ऋण लगानी गरेको छ । बैंकको कर्जा निक्षेप अनुपात ७७ दशमलव ६४ प्रतिशत रहेको छ ।
यस्तै एनआइसी एशिया बैंकले चालू आर्थिक वर्षको ६ महीनामा १६४ प्रतिशत बढीले नाफा कमाएको छ । बैंकले गत पुस मसान्तसम्ममा एक अर्ब ५१ करोड नाफा गरेको छ ।
गत वर्षको सोही अवधिमा बैंकले ५७ करोड मात्रै नाफा गरेको थियो । बैंकले सो अवधिमा निक्षेप सङ्कलन ४६ प्रतिशतले बढाएको छ भने कर्जा लगानी ४८ प्रतिशतले बढाएको छ । बैंकले गत पुस मसान्तसम्म एक खर्ब ७५ अर्ब रुपैयाँ निक्षेप सङ्कलन गरी एक खर्ब ४९ अर्ब रुपैयाँ ऋण लगानी गरेको छ ।