साउदी प्रिन्स सलमानले पाकिस्तानको भविष्य उज्वल रहेको बताए । उनले भने, ‘गत वर्ष पाकिस्तानले पाँच प्रतिशतको दरले आर्थिक प्रगति र्गयो र हालको नेतृत्वमा पाकिस्तानको भविष्य एकदमै सुनौलो रहेका छ ।’
त्यसैले आफूले पाकिस्तानसँग २० अर्ब डलरको सम्झौता गरें जुन पाकिस्तानमा साउदीको लगानीको पहिलो कदम रहेको सलमानले बताए ।
साउदी क्राउन प्रिन्सलाई स्वागत गर्न पाकिस्तानका प्रधानमन्त्री इमरान खान र सेना प्रमुख कमर जावेद बावजा एयरपोर्ट गएका थिए ।
इमरान खानले साउदी राजकुमारलाई आफ्नो कारमा बसाएर प्रधानमन्त्री निवासमा लगेका थिए । कार प्रधानमन्त्री स्वयमले नै चलाएका थिए ।
इमरान खानले भने, '२५ लाख पाकिस्तानी नागरिक साउदी अरबमा काम गर्दछन् । उनीहरु आफ्नो घरपरिवारलाई छाडेर मिहेनत मजदुरी गर्नका लागि साउदी अरब जान्छन् र लामो समयसम्म परिवारका सदस्यबाट टाढा हुन्छन् । यी मजदुरहरु मेरो मनमा छन् । मजदुरी गर्नेहरुसँग धेरै प्रकारका समस्याहरु हुन्छन् । त्यसैले साउदी राजकुमारले उनीहरुका समस्याको ख्याल गर्नुहोला ।'
पाकिस्तानी जनताले साउदी राजकुमारको भ्रमणलाई ऐतिहासिक मानेका छन् र उनीहरुले साउदी अरबबाट आर्थिक सहयोग पाउने आशा पनि राखेका छन् ।
मोहम्मद बिन सलमान सन् २०१७ अप्रिल महिनामा साउदी अरबको राजकुमार बनेका थिए । राजकुमार बनेपछि उनको यो पहिलो पाकिस्तान भ्रमण हो । भ्रमणको क्रममा अर्बाै डलरको व्यापारिक र गैरव्यापारिक सम्झौता हुने अनुमान छ । एजेन्सी
