दशैं नजिकिएसँगै सूचीकृत कम्पनीहरुले धमाधम लाभांश घोषणा गर्न थालेका छन् । म्युचुएल फन्डपछि विस्तारै अन्य सूचीकृत कम्पनीहरुले पनि लाभांश घोषणाको रफ्तार बढाउन थालेका हुन ।

अहिलेसम्म क्षेत्रगत रुपमा सबैभन्दा धेरै ९ वटा हाइड्रोपावर कम्पनीले लाभांश घोषणा गरिसकेका छन् भने त्यसपछि माइक्रोफाइनान्सका ४ वटा कम्पनी, इन्भेष्टमेन्ट समूहका दुई वटा कम्पनी, बैंक समूहका २ वटा, होटल समूहका एक र उत्पादनमूलक समूहको एक वटा कम्पनीले लाभांश घोषणा गरेका छन् ।

अहिलेसम्म उत्पादन तथा प्रशोधन समूहमा रहेको युनिलिभर नेपालले सबैभन्दा बढी १७ सय १४ प्रतिशत नगद लाभांश घोषणा गरेका छन् । कम्पनीले हरेक वर्ष प्रति कित्ता १ हजार भन्दा बढी नगद लाभांश दिँदै आएकोमा यस वर्ष भने अहिलेसम्मकै सबैभन्दा बढी नगद लाभांश घोषणा गरेको हो ।

दोस्रो धेरै लाभांश दिने कम्पनीमा हाइड्रोपावर समूहबाट रुरु जलविद्युत परियोजना लिमिटेड परेको छ । कम्पनीले १५ प्रतिशत बोनस शेयर र त्यसमा लाग्ने शून्य दशमलब ७८९ प्रतिशत नगद लाभांश गरेर कुल १५.७८९ प्रतिशत लाभांश घोषणा गरेको हो ।

त्यसैगरी एभरेष्ट बैंकले १५.५३ प्रतिशत लाभांश घोषणा गरेको छ । बैंकले १० प्रतिशत बोनस शेयर र ५.५३ प्रतिशत नगद लाभांश गरेर कुल १५.५३ प्रतिशत लाभांश घोषणा गरेको हो ।

वित्तीय क्षेत्रअन्तर्गतकै गुराँस लघुवित्त, आशा लघुवित्त, स्वावलम्बन लघुविरुत्त र फवार्ड लघुवित्तले भने राष्ट्र बैंकले तोकेको अधिकतम सीमाको अधिनमा रहेर लाभांश घोषणा गरेका छन् । राष्ट्र बैंकले लघुवित्त कम्पनीहरुलाई १५ प्रतिशतसम्म मात्रै लाभांश वितरण गर्न छुट दिएको छ । १५ प्रतिशतभन्दा बढी लाभांश बाँडनु परेमा ग्राहक संरक्षण कोष, सामािजक उत्तरदायित्व कोषलगायतका विविध कोषहरुमा तोकिएको रकम छुट्याएपछि मात्रै वितरण गर्न पाइने राष्ट्र बैंकको निर्देशनमा उल्लेख छ ।

गुराँस, आशा र स्वावलम्बन लघुवित्त तीनै कम्पनीले १४.२५ प्रतिशत बोनस शेयर र सो बोनस शेयरमा लाग्ने कर प्रयोजनको लागि ०.७५ प्रतिशत नगद लाभांश प्रस्ताव गरेका हुन । त्यसैगरी फवार्ड माइक्रोफाइनान्सले १३.३ प्रतिशत बोनस शेयर र त्यसमा लाग्ने ०.७५ प्रतिशत नगद लाभांश गरी कुल १४ प्रतिशत लाभांश घोषणा गरेको हो ।

हाइड्रोपावर कम्पनीहरुले ३ देखि १५ प्रतिशतसम्म लाभांश प्रस्ताव गरेका छन् । अधिकांश हाइड्रोपावर कम्पनीले बोनस शेयरमै जोड दिएका छन् । लाभांश घोषणा गरेका ५ वटा हाइड्रोपावर कम्पनीमध्ये १ वटा कम्पनीले मात्रै नगद लाभांशमा जोड दिएको छ । माण्डु हाइड्रोपावर १२ प्रतिशत नगद लाभांश मात्रै घोषणा गरेको छ । अपि पावरले ९ प्रतिशत बोनस शेयर र त्यसमा लाग्ने कर प्रयोजनको लागि शून्य दशमलब ४७३७ प्रतिशत नगद लाभांश घोषणा गरेको भए पनि विद्युत नियमन आयोगले स्वीकृति नदिएकाले अहिलेलाई लाभांश स्थगित भएको छ । अपि पावरले एक सू्चना प्रकाशित गरी साधारण सभा समेत स्थगित गरेको छ ।

त्यस्तै सुरपरमाई हाइड्रोपावरले ७ प्रतिशत बोनस र ५.६३ प्रतिशत नगद लाभांश घोषणा गरेको छ भने भगवती हाइड्रोपावरले पनि ४ प्रतिशत बोनस र १०.७३ प्रतिशत नगद लाभांश गरेर कुल १४.७३ प्रतिशत लाभांश घोषणा गरेको हो । यता साहस ऊर्जाले भने ८ प्रतिशत बोनस शेयर र त्यसमा लाग्ने कर प्रयोजनको लागि ०.५२६ प्रतिशत नगद लाभांश घोषणा गरेको छ । साहस ऊर्जाले ८ प्रतिशत बोनस शेयर ०.४२१ नगद लाभांश दिएको छ भने अरुण भ्याली हाइड्रोपावरले ३ प्रतिशत बोनस र त्यसमा लाग्ने ०.१५७ नगद लाभांश गरी ३.१५ प्रतिशत लाभांश घोषणा गरेको छ।

इन्भेष्टमेन्ट समूहबाट हाथवे इन्भेष्टमेन्ट नेपाल र सीइडीबी हाइड्रोपावर डेभलपमेन्ट कम्पनीले लाभांश घोषणा गरेको छ । दुवै कम्पनीले बोनस शेयरमै जोड दिएका छन् । हाथवेले १० प्रतिशत बोनस शेयर र त्यसमा लाग्ने कर प्रयोजनको लागि ०.५२६ प्रतिशत नगद लाभांश घोषणा गरेको छ भने सीइडीबी हाइड्रोपावरले ११ प्रतिशत बोनस शेयर मात्रै घोषणा गरेको छ । त्यसमा लाग्ने कर आफैले व्यवहोर्ने सूचना कम्पनीले प्रेस विज्ञप्तिमार्फत सार्वजनिक गरिसकेको छ ।

होटल समूहबाट अहिलेसम्म ओरियन्टल होटल्स लिमिटेडले मात्रै लाभांश घोषणा गरेको छ । कम्पनीले ५ प्रतिशत बोनस शेयर र ०.२६३ प्रतिशत नगद लाभांश दिने घोषणा गरेको हो ।