नियामक निकायहरुले ‘टी प्लस थ्री’ मा रहेको सेटलमेन्ट प्रक्रियालाई ‘टी प्लस वान’ मा झार्ने प्रस्ताव गर्दा लगानीकर्ताहरुले यसलाई अस्विकार गरेका हुन् ।
यस बिषयमा अध्ययन गर्न नेप्सेले बनाएको एक समितिले सो सम्बन्धमा लगानीकर्ताका विभिन्न संस्थाहरुसँग छलफल सुरु गरेको छ । सोमबार भएको छलफलमा लगानीकर्ताका संस्थाहरु नै यस बिषयमा एकमत हुन सकेनन् ।
लगानीकर्ताका विभिन्न चार संस्थाका प्रतिनिधि छलफलमा सहभागि भएका थिए । तर उनीहरु ‘टी प्लस वान’ मा जान पूर्ण सहमत हुन सकेनन् । यो प्रस्ताव कार्यान्वयनमा आए नगद साथमा नभए लगानीकर्ताले शेयर खरिद गर्न सक्ने छैनन् ।
उद्यारोमा शेयर किनबेच गर्न नपाउने भएपछि ठूला लगानीकर्ताको प्रतिनिधित्व गर्ने संस्था ‘टी प्लस वान’ मा जान इच्छुक नभएको छलफलका एक सहभागीले बताए । तत्काललाई यो व्यवस्था कार्यान्वयन नगर्न पनि लगानीकर्ताले आग्रह गरेका छन् । केहीले ‘टी प्लस टु मा जान सकिने समेत बताए ।
सरकारले मुद्रा तथा पूँजी बजारमा देखिएको समस्या अध्ययन तथा समाधान गर्न गठन गरेका समितिको प्रतिवेदनले शेयर कारोबारको सेटलमेन्ट एक दिनमा झार्न सुझाब दिएको थियो । सोही सुझाब कार्यन्वयन गर्न सरोकारवाला निकाय लागि परे पनि लगानीकर्ता पछि हटेका छन् ।