राष्ट्र बैंकका अनुसार तोकिएको न्यूनतम पूँजीकोष तथा चुक्ता पूँजी पुर्याएका, ५ प्रतिशतभन्दा कम खराब कर्जा भएका बैंकहरुले मात्र काउन्टर खोल्न पाउनेछन् । त्यस्तै राष्ट्र बैंकबाट तोकिएको ब्याज दर अन्तर कायम गरेको र अनिवार्य मौज्दात बाहेक अन्य कुनै कारवाहीमा नपरेको संस्थाले मात्र एक्सटेन्सन काउन्टर खोल्न पाउने जनाएको छ ।
साथै अब काठमाडौं उपत्यका, महानगर र उपमहानगरभित्र काउन्टर खोल्न पाइने व्यवस्था गरेको छ । तर यसका लागि राष्ट्र बैंकको अनुमति लिनुपर्नेछ । तर काठमाडौं उपत्यका, महानगर र उपमहानगरभित्र बाहिर भने राष्ट्र बैंकको अनुमति विना पनि काउन्टर संचालन गर्न पाइने व्यवस्था राष्ट्र बैंकले गरेको छ ।
काठमाडौं उपत्यका, महानगर र उपमहानगरभित्र काउन्टर संचालन गर्ने बैंकहरुले अदालत, अस्पताल, सैनिक ब्यारेक, विश्वविद्यालय, क्याम्पस, विद्यालय, सरकारी कार्यालय, औद्योगिक क्षेत्र तथा विदेशी कुटनैतिक नियोगहरुको सिफारिसमा यी निकायको हाताभित्र वा अधिकतम २०० मिटरसम्मको दूरीभित्र काउन्टर खोल्न सक्ने राष्ट्र बैंकले जनाएको छ ।
यस्ता काउन्टरबाट खाता खोल्न सहजीकरण गर्ने, निक्षेप संकलन र निक्षेप खाताबाट रकम भुक्तानी गर्न पाइने छ। राष्ट्र बैंकको स्वीकृति लिएर बैदेशिक रेमिटेन्स पनि भुक्तानी गर्न सकिने छ। यस्ता काउन्टरले हिसाब मिलानका लागि नजिकको शाखा तोक्नु पर्छ।
यस्ता एक्सटेन्सन काउन्टरबाट बिदेशी मुद्राको सटही गर्न र आन्तरिक रेमिटेन्स भुक्तानी गर्न नपाइने राष्ट्र बैंकले जनाएको छ ।