संयुक्त राष्ट्र संघ अन्तर्गतको संस्था अन्तरराष्ट्रिय श्रम संगठन (आईएलओ) ले जारी गरेको रिपोर्टका अनुसार, सन् २०२० मा विश्वभर बेरोजगारको संख्या २५ लाख बढ्ने अनुमान रहेको छ ।
रिपोर्ट अनुसार, पछिल्लो समय बेरोजगारहरुको संख्यामा लगातार वृद्धि भइरहेको छ । हाल विश्व बरोजगारीको दर ५.४ प्रतिशत रहेको छ । यो दरमा ठूलो परिवर्तन नआएपनि सुस्ताउँदो गतिमा रहेको विश्व अर्थव्यवस्थाका कारण बेरोजगारहरुको संख्या बढिरहेको छ ।
सन् २०२० मा बेरोजगारीहरुको संख्या २५ लाखले बढेर १९ करोड ५ लाख पुग्ने आईएलओको अनुमान छ । सन् २०१९ मा उक्त आँकडा १८ करोड ८० लाख रहेको थियो ।
रिपोर्टका अनुसार, विश्वमा करिब २८ करोड ५० लाख मानिसहरुसँग पर्याप्त रोजगार छैन । अर्थात् यि मानिसहरुले आफूले चाहेको र आफ्नो क्षमता अनुसारको काम गर्न पाइरहेका छैनन् । यिमध्ये कतिपय मानिसहरुले रोजगारको खोजी नै बन्द गरिसकेका छन् । त्यस्तै १२ करोड मानिसले विकल्प नभएको कारण मन नपरेको काममा चित्त बुझाएर बसेका छन् ।
कुल ४७ करोड ३० लाख मानिसहरु पूर्ण रुपमा बेरोजगार वा उनीहरुसँग कामको कमी रहेको प्रतिवेदनमा उल्लेख छ । यो विश्वभरमा उपलब्ध श्रमशक्तिको १३ प्रतिशत हो । एजेन्सी
