मन्त्रालयको नियमित पत्रकार सम्मेलनमा दिइएको जानकारी अनुसार ढलकाे पानीको माध्यमबाट भाइरस संक्रमण मानिसमा सर्ने पु्ष्टि भएको छैन । मन्त्रालयका प्रवक्ता जागेश्वर गौतमका अनुसार काठमाडौंको ढलमा कोरोना भाइरस भेटिएता पनि रोग सार्न सक्ने देखिँदैन।
उनले भने,'सामान्य तापक्रमको पानी क्लोरिन जस्तै जिवाणु नाशक औषधी राखिएको फोहोर पानी अर्थात अस्पतालबाट निस्कने ढलकोे पानीमा कोरोना भाइरस दुई दिनसम्म बाँच्ने गरेको पाइएको छ । तरपनि अन्य रोगको संक्रमण हुनसक्ने संभावना रहेकाले ढलको प्रशोधन र व्यवस्थापन हुन जरुरी छ ।'
यद्धपी कोभिड १९ को अंश ढलको पानीमा भेटिदैंमा समुदायमा संक्रमण फैलिएर जटिल अवस्था सिर्जना भयो भन्न नमिल्ने पनि उनले बताएका छन् । उनले ढलको व्यवस्थापन गर्ने कर्मचारीलाई उचित सतर्कता तथा सावधानी अपनाउन अनुराेध गरेका छन्।
हाल भेटिएको भाइरसको थप अनुसन्धान मन्त्रालयले गर्ने पनि प्रवक्ता गाैतमले जानकारी दिएका छन् । ढलको पानीमा काेराेना भाइरस देखियो भन्दैमा नआत्तिन र नडराउन पनि मन्त्रालयले आग्रह गरेको छ ।
