यस अवधिमा गुराँस लाइफ इन्स्योरेन्स बाहेक सबै जीवन तथा निर्जीवन बीमा कम्पनीहरुले बीमाशुल्क बढाउन सफल भएका छन् ।
गत आर्थिक वर्षको कार्तिक सम्मको तुलनामा जीवन बीमा कम्पनीहरुको बीमाशुल्क २३.२२ प्रतिशतले बढेर ४८ अर्ब ३२ करोड रुपैयाँ पुगेको छ । गत आर्थिक वर्षको यहि अवधिसम्ममा जीवन बीमा कम्पनीहरुले ३९ अर्ब २२ करोड रुपैयाँ मात्रै बीमाशुल्क आर्जन गरेका थिए ।
यस्तै निर्जीवन बीमा कम्पनीहरुले पनि कुल बीमाशुल्क २७.३६ प्रतिशतले बढाएर १२ अर्ब ५८ करोड रुपैयाँ पुर्याएका छन । गत आर्थिक वर्षको कार्तिक सम्ममा निर्जीवन बीमा कम्पनीहरुले ९ अर्ब ८८ करोड रुपैयाँ मात्रै कुल बीमाशुल्क आर्जन गरेका थिए ।
नयाँ कम्पनीले व्यवसाय विस्तार गर्दा गुराँस लाइफको भने घट्दै
चालु आर्थिक वर्षको कार्तिक सम्ममा व्यवसाय विस्तारमा नयाँ जीवन बीमा कम्पनीहरु आक्रमक देखिएका छन् । सन नेपाल लाइफले सर्वाधिक ११७ प्रतिशतले बीमाशुल्क बढाउँदा प्रभु लाइफ र सिटिजन लाइफले पनि बीमाशुल्क १०० प्रतिशत भन्दा धेरैले बढाएका छन् ।
बीमाशुल्क आर्जनमा पुराना कम्पनीहरुलाई उछिन्दै महालक्ष्मी लाइफ, रिलायवल नेपाल लाइफm रिलायन्स, सानिमा, ज्योति र आइएमई लाइफ शिर्ष सूचीमा रहेका छन् ।
सबै जीवन बीमा कम्पनीहरुले बीमाशुल्क बढाउँदा गुराँस लाइफको भने घटेको छ । गुराँस लाइफको बीमाशुल्क ६.३७ प्रतिशतले घटेर १ अर्ब ९ करोड रुपैयाँमा सीमित भएको हो ।
गत आर्थिक वर्षको कार्तिक सम्ममा गुराँस लाइफले १ अर्ब १७ करोड रुपैयाँ बीमाशुल्क आर्जन गरेको थियो ।
बीमाशुल्क आर्जनमा नेपाल लाइफको शिर्ष स्थान कायमै
जीवन बीमा अन्तर्गत नेपाल लाइफले आफ्नो अग्रतालाई कायम राख्दै एक्लैले १२ अर्ब ५५ करोड रुपैयाँभन्दा बढी बीमाशुल्क आर्जन गरेको छ । यो जीवन बीमा कम्पनीहरुले आर्जन गरेको कुल बीमाशुल्कको २५.९८ प्रतिशत हो ।
गत आर्थिक वर्षको कार्तिक सम्ममा कम्पनीले ११ अर्ब १८ करोड रुपैयाँ कुल बीमाशुल्क आर्जन गरेको थियो ।
नेपाल लाइफ पछि एलआईसी नेपालको १३.६३ प्रतिशत योगदान रहेको छ । यस अवधिमा एलआईसीले ६ अर्ब ५८ करोड रुपैयाँ बीमा शुल्क आर्जन गरेको छ ।
सबैभन्दा कम बीमाशुल्क आर्जन गर्नेमा भने महालक्ष्मी लाइफ इन्स्योरेन्सको रहेको छ । यस अवधिमा कम्पनीले ४४ करोड ३४ लाख रुपैयाँ मात्रै बीमाशुल्क आर्जन गरेको छ । यो जीवन बीमा कम्पनीहरुले संकलन गरेको कुल बीमाशुल्कको ०.९२ प्रतिशत मात्रै हो ।
बीमाशुल्क आर्जनमा शिखर पहिलो बन्दा व्यवसाय बढाउनेमा हिमालयन अघि
कुल बीमाशुल्क आर्जनमा शिखर इन्स्योरेन्सले आफुलाई अब्बल सावित गरेको छ । चालु आर्थिक वर्षको कार्तिकसम्ममा शिखरले सबैभन्दा धेरै १ अर्ब ३८ लाख रुपैयाँ बीमाशुल्क आर्जन गरेको छ । यो निर्जीवन बीमा कम्पनीहरुले आर्जन गरेको कुल बीमाशुल्कको ११ प्रतिशत हो ।
शिखर इन्स्योरेन्सले गत आर्थिक वर्षको कार्तिकसम्ममा १ अर्ब १२ करोड रुपैयाँ बीमाशुल्क आर्जन गरेको थियो ।
कुल बीमाशुल्कको आधारमा व्यवसाय बढाउनेमा भने हिमालयन जनरल इन्स्योरेन्स पहिलो स्थानमा रहेको छ । हिमालयनले यस अवधिमा सबैभन्दा धेरै ८४.०६ प्रतिशतले बीमाशुल्क बढाउदै ५८ करोड ८९ लाख रुपैयाँ पुर्याएको छ । गत आर्थिक वर्षको यहि अवधिमा हिमालयनले ३२ करोड रुपैयाँ मात्रै बीमाशुल्क आर्जन गरेको थियो ।
यस्तै, सानिमा जनरल इन्स्योरेन्सको ५९.९३ प्रतिशत र युनाइटेड इन्स्योरेन्सको ५८.८१ प्रतिशतले बीमाशुल्क बढेको छ ।
सबै भन्दा कम बीमाशुल्क बढाउनेमा भने लुम्बिनी जनरल इन्स्योरेन्स रहेको छ । लुम्बिनीको बीमाशुल्क २.३२ प्रतिशतले बढेर ४७ करोड ६ लाख रुपैयाँ पुगेको छ । गत आर्थिक वर्षको यही अवधिमा कम्पनीले ४६ करोड रुपैयाँ मात्रै बीमाशुल्क आर्जन गरेको थियो ।
सबैभन्दा कम बीमाशुल्क आर्जन गर्नेमा भने सानिमा जनरल रहेको छ । यस अवधिमा सानिमाले २८ करोड ७८ लाख रुपैयाँ बीमाशुल्क आर्जन गरेको हो । निर्जीवन बीमा कम्पनीहरुले आर्जन गरेको कुल बीमाशुल्कमा यो २.२९ प्रतिशत मात्रै हुन आउछ ।