कुल बीमा शुल्क आर्जनमा शिखर इन्स्योरेन्स शीर्ष स्थानमा रहेको छ । कम्पनीले चालु आर्थिक वर्षको पुससम्ममा शिखरले सबैभन्दा धेरै २ अर्ब ६५ करोड २३ लाख रुपैयाँ कुल बीमा शुल्क आर्जन गरेको छ । यो निर्जीवन बीमा कम्पनीहरुले आर्जन गरेको कुल बीमाशुल्कको १३.२१ प्रतिशत हो ।
कुल बीमाशुल्क आर्जनमा शिखर पछि नेको इन्स्योरेन्स रहेको छ । नेकोले यस अवधिमा १ अर्ब ५४ करोड रुपैयाँ बीमाशुल्क आर्जन गरेको छ ।
यस्तै हिमालयन एभरेष्टले १ अर्ब ५० करोड रुपैयाँ, सगरमाथा इन्स्योरेन्सले १ अर्ब ४९ करोड रुपैयाँ, राष्ट्रिय बीमा संस्थानले १ अर्ब ४० करोड रुपैयाँ, सिद्धार्थ इन्स्योरेन्सले १ अर्ब ३४ करोड रुपैयाँ एनएलजी इन्स्योरेन्सले १ अर्ब २० करोड रुपैयाँ, प्रिमियर इन्स्योरेन्सले १ अर्ब ७ करोड रुपैयाँ र सानिमा जिआईसीले १ अर्ब १ करोड रुपैयाँ कुल बीमाशुल्क आर्जन गरेका छन् । बाँकी कुनैपनि कम्पनीको बीमाशुल्क एक अर्ब माथि पुग्न सकेको छैन् ।
सबैभन्दा कम बीमा शुल्क आर्जन गर्नेमा भने नेशनल इन्स्योरेन्स कम्पनी रहेको छ । कम्पनीले यस अवधिमा ४९ करोड ४० लाख रुपैयाँ मात्रै बीमाशुल्क आर्जन गरेको छ । यो निर्जीवन बीमा कम्पनीहरुले आर्जन गरेको कुल बीमाशुल्कको २.४६ प्रतिशत मात्रै हुन आउँछ ।
राष्ट्रिय बीमा कम्पनीले व्यवसाय बढाउँदा युनाइटेको सबै भन्दा धेरै घट्यो
राष्ट्रिय बीमा कम्पनीले व्यवसाय बढाउनेमा आफुलाई शीर्ष स्थानमा राख्न सफल भएको छ । कम्पनीले यस अवधिमा सबैभन्दा धेरै १३७.९७ प्रतिशतले बीमाशुल्क बढाउदै १ अर्ब ४० करोड ७७ लाख रुपैयाँ पुर्याएको हो ।
गत आर्थिक वर्षको यही अवधिमा कम्पनीले ५९ करोड १५ लाख रुपैयाँ मात्रै बीमाशुल्क आर्जन गरेको थियो ।
यस्तै, लुम्बिनी जनरल इन्स्योरेन्सको बीमाशुल्क पनि २५.०५ प्रतिशतले बढेर ९७ करोड १९ लाख रुपैयाँ पुगेको छ । अजोड इन्स्योरेन्सको १४.२३ प्रतिशत, सानिमा जिआईसीको ९.६९ प्रतिशत, आइएमई जनरलको ९.४४ प्रतिशत र शिखर इन्स्योरेन्सको ८.७९ प्रतिशतले बीमाशुल्क बढेको छ ।
सबैभन्दा कम बीमा शुल्क बढाउनेमा भने एनएलजी इन्स्योरेन्स रहेको छ । एनएलजीको बीमाशुल्क ०.२८ प्रतिशतले मात्रै बढेर १ अर्ब २० करोड ३८ लाख रुपैयाँ पुगेको हो ।
गत आर्थिक वर्षको यही अवधिमा एनएलजीले १ अर्ब २० करोड ४ लाख रुपैयाँ मात्रै बीमाशुल्क आर्जन गरेको थियो ।
६ कम्पनीको व्यवसाय खस्कियो
१८ निर्जीवन बीमा कम्पनीहरु मध्ये १२ वटाले आफ्नो व्यवसायलाई विस्तार गर्दा ६ वटा कम्पनीको व्यवसाय भने खस्किएको छ ।
यस अवधिमा युनाइटेड इन्स्योरेन्स, सगरमाथा इन्स्योरेन्स, प्रुडेन्सियल इन्स्योरेन्स, प्रिमियर इन्स्योरेन्स, नेको इन्स्योरेन्स र नेपाल इन्स्योरेन्सको बीमाशुल्क भने घटेको हो ।
सबै भन्दा धेरै युनाइटेड इन्स्योरेन्सको बीमाशुल्क ३२.७६ प्रतिशतले घटेर ५९ करोड ३१ लाख रुपैयाँमा सीमित भएको छ । गत आर्थिक वर्षको यहि अवधिमा कम्पनीले ८८ करोड २१ लाख रुपैयाँ कुल बीमाशुल्क आर्जन गरेको थियो ।
यस्तै, सगरमाथा इन्स्योरेन्सको १३.३९ प्रतिशत, प्रुडेन्सियलको ३.३२ प्रतिशत, प्रिमियरको २.९८ प्रतिशत, नेकोको २.४० प्रतिशतले बीमाशुल्क घटेको छ ।
सबै भन्दा कम बीमाशुल्क घट्नेमा नेपाल इन्स्योरेन्स रहेको छ । नेपाल इन्स्योरेन्सको बीमाशुल्क ०.५४ प्रतिशतले घटेर ७९ करोड ३६ लाख रुपैयाँमा सीमित भएको हो ।
गत आर्थिक वर्षको यहि अवधिमा नेपाल इन्स्योरेन्सले ७९ करोड ७९ लाख रुपैयाँ बीमाशुल्क आर्जन गरेको थियो ।
चालु आर्थिक वर्षको पुससम्ममा निर्जीवन बीमा कम्पनीहरुले १३ लाख ९५ हजार ३२ वटा बीमालेख जारी गरी २० अर्ब ८ करोड २५ लाख रुपैयाँ बराबरको बीमाशुल्क आर्जन गरेका हुन् ।
