प्राधिकरणले बागमती प्रदेशको धादिङमा गजुरी गाउँपालिकामा आयोजित बीमा सचेतना कार्यक्रमलाई सम्बोधन गर्दै कार्यकारी निर्देशक पौडेलले आर्थिक रूपले सक्षम व्यक्तिलाई बीमा गर्न प्रोत्साहन गर्ने वातावरण बनाउन र घर बीमालाई अनिवार्य गर्न आग्रह गरेका हुन् ।
कार्यकारी निर्देशक पौडेलले कृषि तथा पशु प्राविधिकहरूलाई बीमा सम्बन्धी तालिम दिनका लागि सहजीकरण गर्न प्राधिकरण तयार रहेको पनि जानकारी गराए ।
कार्यक्रममा गजुरी गाउँपालिकाका अध्यक्ष गणेशलाल श्रेष्ठले बीमा प्रतिको जनविश्वास बढाउन बीमा कम्पनीहरूले दाबी भुक्तानी समयमा नै गर्नुपर्ने बताए ।
यसैगरी, प्राधिकरणले माघ १८ गते चितवनको इच्छाकामना गाउँपालिकामा बीमा सम्बन्धी जानकारी मूलक अन्तरक्रिया कार्यक्रम आयोजना गरेको छ । कार्यक्रममा प्राधिकरणका कार्यकारी निर्देशक पौडेलले स्थानीय वासिन्दाको आग्रह अनुसार गाउँपालिकामै बीमा कम्पनीका शाखा कार्यालय खोल्न प्राधिकरणले पहल गर्ने जानकारी गराए ।
उनले घर र कृषितथा पशुपन्छी बीमामा जोड दिन र शाखा कार्यालयबाट नै बीमा दाबी भुक्तानी दिने व्यवस्था गर्न बीमा कम्पनीहरूलाई निर्देशन समेत दिए ।
इच्छाकामना गाउँपालिकाका अध्यक्ष दानबहादुर गुरूङले गाउँपालिकाको भौगोलिक कठिनताका कारण बीमा गर्न धेरै टाढा जानुपर्ने बाध्यता रहेकाले गाउँपालिकामा नै बीमा कम्पनीका शाखा कार्यालय खोल्न आग्रह गरे ।
यसैगरी, प्राधिकरणका उपनिर्देशक निर्मल अधिकारीको उपस्थितिमा माघ १८ गते गण्डकी प्रदेशको गोरखाको भीमसेन थापा गाउँपालिका र राष्ट्रिय बीमा कम्पनी लिमिटेडबीच बीमा सम्बन्धी सम्झौता भएको छ ।
सम्झौता पत्रमा भीमसेन थापा गाउँपालिकाका अध्यक्ष लोक प्रसाद बंजरा र राष्ट्रिय बीमा कम्पनी लिमिटेडका नायव प्रमुख कार्यकारी अधिकृत सुवास कोइरालाले हस्ताक्षर गरेका हुन् ।
सम्झौतामा गाउँपालिका भित्रका सबै नागरिकको दुर्घटना बीमा र घरहरूको सम्पत्ति बीमा गर्ने,सरकारी सम्पत्तिहरूको बीमा गर्नका लागि आवश्यक कार्य अगाडि बढाउने, कृषि तथा पशुपन्छी बीमा र कृषि औजारहरूको बीमा क्रमिकरूपमा गर्दै जाने लगायतका विषयहरू उल्लेख रहेका छन् ।