नेपालगन्जदेखि, धनगढी र महेन्द्रनगरसम्मका होटलहरुमा पुगेर ‘गर्लफ्रेण्ड’संगको रासलिला मच्चाएका काण्डहरु सार्वजनिक भए पछि उनी एमालेको जिल्ला अध्यक्ष मात्र छोड्न वाध्य भएनन्, मन्त्री पद पनि गुमाउन पुगे । यौन काण्डको बेला त्यसलाई ढाकछोप गरिदिनको लागि पार्टी अध्यक्ष केपी ओलीको साथ खोजेका सोडारीलाई ओलीले साथ दिएनन् ।
त्यसैको रिसमा उनी एमाले विभाजन हुँदा माधव नेपाल नेतृत्वको नेकपा समाजवादीमा लागे र विहिबार मुख्यमन्त्री नियुक्त भए । उनलाई मुख्यमन्त्री नबनाउन एमालेले अन्तिम समयसम्म पनि अडान लिनुको कारण उनको त्यही काण्ड थियो । तर, संसदिय अंक गणितको कारण एमालेले उनलाई अन्तिम समयमा मुख्यमन्त्रीमा समर्थन गर्यो । यसरी विवादास्पद यौन काण्डका एक अभियुक्त सोडारी मुख्यमन्त्री बने । उनी यौन अपराधमा मात्र होइन, विभिन्न आर्थिक स्क्याण्डलहरुमा समेत फसेका व्यक्ति हुन् । अब उनले प्रदेशमा कसरी शासन चलाउलान, आर्थिक र समाजिक अपराधकर्मलाई कसरी नियन्त्रण गर्लान, त्यो हेर्न बांकी नै छ ।
गजब के छ भने आफूहरुले नैतिक मूल्य मान्यतासहितको राजनीति गरिरहेको दावि गर्ने नेकपा समाजवादीका अध्यक्ष माधव नेपाल र महासचिव घनश्याम भुषालले सोडारी जस्तो विवादास्पद व्यक्तिलाई मुख्यमन्त्री बनाउन मरिमेटेरलाग्नुको कारण के हो ? रहस्यको विषय बनेको छ ।
त्यसो त यौन काण्डमा फसेर पनि उन्मुक्ती पाउने सोडारी एक जना मात्रै होइनन् । एमाले केन्द्रिय सदस्य ऐन महर यौन काण्डमा परेर केही दिन पार्टी कारवाहीमा परे । तर, पछि फेरि कुनै कारण बिना नै उनको कारवाही फिर्ता गरियो । त्यस्तै एकजना कार्यकर्ताले एमाले पोलिटव्युरो सदस्य महेश बस्नेत माथि लगाएको यौन शोषणको आरोपले संचारमाध्यम र सामाजिक संजालमा लामो समयदेखि चर्चा पाइरहेको छ । यद्धपी प्रमाण नपुगेको भन्दै प्रहरीले उनी विरुद्ध कारवाही नचलाउने निर्णय गरेको छ ।
गत स्थानीय निर्वाचनको पूर्व सन्ध्यामा एमाले नेता तथा काठमाण्डौ महानगरपालिकाका प्रमुख पदका उम्मेद्वार केशव स्थापित माथि यौन शोषणको आरोप लाग्यो । स्थापितले त्यसलाई तथ्यपरकरुपमा खण्डन गर्न सकेनन् ।
त्यसको असर निर्वाचनको परिणाममा पनि परेको चर्चा एमाले वृतमा अझै चलिरहेको छ । तर, एमालेले स्थापितलाई कारवाही गरेन, न त त्यो काण्डको छानबिन गरेर सत्यतथ्य नै पत्ता लगाउने प्रयास गर्यो ।
एमाले र समाजवादी लगायतका राजनीतिक पार्टीहरुका माथिल्लो तहका नेताहरु मात्र होइन, प्रदेश र जिल्ला स्तरका नेता कार्यकर्ता पनि यस्ता काण्डमा मुछिदैं आएका छन् । तर, त्यस्ता दोषिहरुलाई कारवाही गर्नुको साटो
पुरस्कृत गर्ने प्रवृत्तिले अपराधकर्मलाई नै बढवा दिइरहेको छ भन्नेमा शंका छैन । उदाहरणको लागि आफ्नै कार्यकर्तासंग रासलिला मच्चाइरहेको सार्वजनिक भएपछि सभामुख पद गुमाउन पुगेका कृष्ण वहादुर महरालाई जेलबाट छुट्नासाथ माओवादीले उपाध्यक्ष नियुक्त गर्यो ।
केही महिना अगाडि सुन काण्डमा समातिएका महरालाई अझैसम्म पनि सो पार्टीले कारवाही गरेको छैन,बरु माओवादीका नेता कार्यकर्ताहरु ‘राष्ट्रवादी अडान राख्दा महरालाई फसाइएको हो’ भन्ने दावी गर्ने गर्छन् ।