अहिले इजरायल र इरानबीचकाे द्वन्द्वले नै सुनकाे भाउ बढ्नुकाे मुख्य कारण रहेकाे छ । हाल भूराजनीतीक तनावका कारण सुनकाे भाउमा अस्थिरता कायम रहेकाे छ । यद्धपि लगानीकर्ताहरूले सुनलाई सुरक्षित लगानीका रूपमा मान्ने गरेका छन्। जसकारण यतिबेला लगानीकर्ताहरूले सुनमाथि नै लगानी थुपारिरहेका छन् । यसले सुनकाे भाउ नयाँ रेकर्डस्तरसम्म पुग्नुलाई थप मद्धत पुगेकाे छ ।
नेपाल सुनचाँदी व्यवसायी महासंघका अनुसार अमेरिकी रिजर्ब बैंकको ब्याजदर कटौती गर्ने नीतिका कारण पनि विश्वभर सुनकाे भाउ बढेकाे हाे । अर्काेतर्फ, चिनले सुनमा बढाएको लगानी लगायतका कारणले सुनको मुल्य उचाइमा पुगेको बिश्लेषकहरुले बताइरहेका छन्।
विश्व बजारमा कस्ताे रह्याे सुनकाे भाउ ?
साताको पहिलो दिन, आइतबारको तुलनमा दोस्रो दिन साेमबार सामान्य मात्र बढेको सुनको मुल्य साताको तेस्रो दिन मंगलबार नयाँ रेकर्ड कायम गर्न सफल भयो । बुधबार स्थिर रहेको मुल्य बिहिबार सामान्य घटेको भए पनि शुक्रबार फेरि उच्च रेकर्डमा पुग्यो । शुक्रबार सुन प्रति हउन्स २ हजार ३७८ डलर बराबरमा खरिदबिक्री भइरहेकाे तथ्यांकले देखाउँछ । चाँदी प्रतिअउन्स २८ डलरमा किनबेच हुँदैछ ।
साताभरमा ताेलामा २,५००ले बढ्याे सुन
विश्व बजारमा रहेकाे सुनकाे भाउले नै नेपाली बजारमा भाउ ताेकिने भएकाले नेपालमा पनि यसकाे प्रभाव स्वत: परेकाे छ । नेपाली बजारमा सुनकाे भाउ दिन प्रतिदिन उच्च हुँदै गएकाे छ ।
नेपालमा यो साता पनि सुनको मुल्यले नयाँ रेकर्ड कायम गरेको छ । साताकाे पहिलाे दिन, सुन प्रतिताेला एक लाख ३६ हजार ८०० रूपैयाँमा काराेबार भएकाे थियाे । आइतबारको तुलनामा दोस्रो दिन, साेमबार सामान्य बढेको मुल्यले मंगलबार नयाँ उचाई लियो । साेमबार सुन ताेलाकै एक लाख ३७ हजार ५०० रूपैयाँ र मंगलबार प्रतिताेला एक लाख ३९ हजार २०० रूपैयाँ पुग्याे ।
बुधबार स्थिर रही विहिबार सामान्य घटेको मुल्य शुक्रबार फेरी उच्च रेकर्ड कायम गर्दै प्रतिताेला एक लाख ३९ हजार ३०० रूपैयाँमा कराेबार भयाे । यो मुल्य साताको पहिलो दिनको तुलनामा पछिल्लो कारोबार भएको दिन शुक्रबार ताेलामा २ हजार ५०० रुपैयाँले बढी हो ।
यो साता नेपाली बजारमा चाँदीको मुल्य पनि बढेको छ । साताको पहिलो दिन आइतबार प्रतिताेला एक हजार ७०० रुपैयाँ रहेको मुल्य अन्तिम दिन शुक्रबार प्रतिताेला एक हजार ४ सय ७२० रूपैयाँ कायम भयो ।