बैंकले निस्क्रिय कर्जालाई २.३५ बाट २.०१ प्रतिशतमा झारेर ७ करोड रुपैयाँ जोखिम ब्यहोर्ने कोषबाट नाफामा सारेको छ भने १९ करोड रुपैयाँ जोखिम ब्यहोर्ने कोषमा राखेको छ । बैंकको प्रगति झल्काउने निक्षेप र कर्जा परिचालन खासै बढेको छैन भने कर्मचारी खर्च १०३ र संचालन खर्च १०१ प्रतिशतले बढेको छ । यस्तो अबस्थामा बैंकले शुल्क, कमिशन र विदेशी मुद्राको कारोबारबाट गरेको आम्दानी नै नाफाको आधार रहेको देखिएको छ ।
बैंकका प्रमुख कार्यकारी राजन सिंह भण्डारीले बैंकको निक्षेप र कर्जा विस्तारमा खासै प्रगति गर्न नसकिएको स्वीकार गर्नुभयो । उहाँले भन्नुभयो– निक्षेप र कर्जा विस्तारमा खासै धेरै प्रगति गर्न सकिएन । हाम्रो खुद संचालन नाफा पहिलो त्रैमासमा २६ करोड थियो भने दोस्रो त्रैमासमा ५३ करोड ९८ लाख रुपैयाँ छ । त्यसैगरी संचालन र कर्मचारी खर्च पनि बढेका छन् । आगामी त्रैमासमा अरु राम्रो गर्ने सोचमा छौ ।
बैंकको चुक्ता पूँजी २ अर्ब ३७ करोड रहेको अबस्थामा बैंकले यस आर्थिक बर्षमा ६० करोड रुपैयाँ खुद नाफा गर्नसक्ने आँकलन गरिएको भण्डारीले बताउनुभयो ।
बैंकको प्रति शेयर आम्दानी बार्षिकीकरण गर्दा २३.५२ रुपैयाँ पुगेको छ र लगानीकर्ताले गत बर्षकै हाराहारीमा प्रतिफलको आश गर्नु स्वभाविक हुने प्रमुख कार्यकारी भण्डारीले बताउनुभयो । सो बैंकले गत बर्ष १३ प्रतिशत बोनस शेयरसहित १९ प्रतिशत लाभांश वितरण गरेको थियो । बैंक CZBIL मा २३.८७ प्रतिशत तरलता रहेकोले लगानी बढाई आम्दानी गर्नसक्ने र निस्क्रिय कर्जा अरु घटाउनसक्ने संभावना भने निकै छ ।
