लक्ष्मी क्यापिटलका अनुसार ४० करोड रुपैयाँको फण्डमा एक अर्ब १५ करोड रुपैयाँ भन्दा बढीको ईकाई माग भएको पुष्टि भईसकेको छ । क्यापिटलले कतिपय आबेदनकको चेक क्लियरिङको क्रममा रहेकाले आबेदन रकमको आकार अझै बढ्नसक्ने बताएको छ । संस्थागत र सर्वसाधारण दुै खाले लगानीकर्ताले उत्साहपूर्ण सहभागिता जनाएको क्यापिटलको भनाई छ । बढी आबेदन परेका कारण कोषको आकार अब ५० करोड पुगेको छ ।क्यापिटलले लक्ष्मी भ्यालु फण्ड १ को बांडफांड बढीमा ४० दिनमा गरिसक्ने जनाएको छ ।
लक्ष्मी क्यापिटल लक्ष्मी बैंकको सहायक कम्पनी हो । पाँच बर्षे बन्दमुखी लक्ष्मी भ्यालु फण्ड १ को १० रुपैयाँ मूल्यको चार करोड ईकाईको माघ २९ गतेदेखि बिक्री खुला गरिएको थियो ।
सामुहिक लगानी कोष शेयर बजारका लगानीकर्ताहरुको लागि सुरक्षित क्षेत्र भएको, यसअघि जारी भएका लगानी कोषहरुले लगानीकर्ताहरुलाई राम्रो प्रतिफल दिन थाल्दा आकर्षण बढेको, लगानीकर्ताहरुको मनोबल मध्यमस्तरको रहेको र बजारमा तरलताको अबस्था रहेको लगायतका कारणले लक्ष्मी भ्यालु फण्डमा धेरै रकमको आबेदन परेको हुनसक्ने आँकलन गरिएको छ । यसअघि जारी भएका सामुहिक लगानी कोषहरुमा पनि निर्धारित समय भन्दा अगाडि नै माग भन्दा धेरै गुणा बढी आबेदन परी कोषको आकार बढेको थियो ।
पूँजी बजारलाई आधार प्रदान गर्न आएको लक्ष्मी म्युचुअल फण्ड पाँचौ कम्पनी हो । यस अघि सिद्धार्थ क्यापिटल, नबिल ईन्भेष्टमेन्ट, एनएमबी क्यापिटल र एनआईबीएल क्यापिटलले यस्ता ईकाईहरु निश्काशन गरी अधिकांश कोष पूँजी बजारमा परिचालन गरिरहेका छन् । ईकाईको हिसावले लक्ष्मी म्युचुअल फण्ड छैटौं ईकाई हो ।
शेयर बजारमा जोखिम मूल्याङकन गरी लगानी गर्न नसक्नेहरुका लागि यस्ता सामुहिक लगानी कोष निकै उपयोगी हुने गरेका छन् । यस्ता कम्पनीहरुले शेयर बजारमा कम्पनीको अबस्था, संस्थागत सुशासन, प्रगति गर्नसक्ने संभावना, जोखिमको अबस्थालगायतका बिषय मूल्याङकन गरी लगानी गर्ने हुँदा ईकाईधनी सर्बसाधारणले ढुक्कले प्रतिफल पाउने गर्छन । बर्षेनी ईकाईधनीले लाभांश पाउनुकासाथै पाँच बर्षे अवधि समाप्त भएपछि जम्मा प्रतिफलसहितको एकमुष्ट रकम फिर्ता पाउने भएकाले सामुहिक लगानी कोष अति नै सुरक्षित मान्निछ ।
अर्कोतर्फ यस्ता कोषहरुले जम्मा भएको पूँजीको ८० प्रंतिशतसम्म रकम शेयर बजारमै लगानी गर्ने हुँदा पूँजी बजारलाई ठूलो आधार मिल्ने र स्थायित्व ल्याउने गरेको छ । यसअघिका चार वटा सामुहिक लगानी कोषहरुले शेयर बजारमा गरेको लगानीले हालैका दिनहरुमा राम्रा कम्पनीको शेयरको मूल्यमा बृद्दि देखिनुका साथै प्रतिकुल अबस्थामा पनि बजार धेरै तल खस्कन र धेरै माथि जानबाट रोकेको छ । सामुहिक लगानी कोषहरुले अहिले राम्रा कम्पनीको शेयर मूल्य माथि जान नदिई खरिद गर्ने प्रबृत्ति देखाएका छन् । पछिल्ला दिनहरुमा नेपला स्टक एक्सचेन्जमा बीस करोड भन्दा माथिको दैनिक शेयर कारोबार हुनुमा सामुहिक लगानी कोषहरुकै प्रभाव मानिएको छ ।