बीकेले भने, हामीले चारवटा बैंकहरुसँग छलफल चलायौं । केपीएमजी लगायतका अन्र्तराष्ट्रिय लेखापरीक्षण संस्थाहरुबाट मुल्यांकन गराएर शेयर स्वाप रेसियो कायम गरौं, लागेको खर्च मिलेर ब्यहोरौला पनि भन्यौ तर कसैले मानेनन् ।
उनले आफ्नो एभरेष्ट बैंकमा जस्तो छिटो र सहज रुपमा निर्णय गर्न अरु बैंकका संचालक समिति असफल भएकाले पनि मर्ज र एक्विजिशनको कुरा टुंगोमा पुग्न नसकेको हुनसक्ने अनुमान लगाए ।
उनले शेयर स्वाप रेसियो कसरी तय गर्ने भन्ने कुरामै मर्ज र एक्विजिशनको मामिला अल्झिएको भन्दै प्रति शेयर आम्दानीको आधारमा पनि गर्न सकिने प्रस्ताव गरिएको जनाए । उनले अन्य बैंकहरुलाई ४ः१ (उनीहरुको चार शेयर वापत एभरेष्ट बैंकको एक शेयर)को स्वाप रेसियो प्रस्ताव गरिएको कुरा पनि खुलाए तर एभरेष्टसँग कुरा भएका बैंकहरुको नाम भनेनन् । स्रोतका अनुसार एभरेष्टले कुमारी, सेन्चुरी, लुम्बिनी र सिभिल बैंकसँग मर्जको प्रस्ताव राखेको थियो ।
साधारणसभामा एभरेष्टको पर्याप्त नाफा र पूँजीगत जगेडा कोष भए पनि अपेक्षाकृत बोनस शेयर नदिएको भन्दै लगानीकर्ताहरुले ब्यवस्थापनको आलोचना गरेका थिए । बैंक संचालक समितिमा बिकेले आफन्तहरुलाई राखेर हालीमुहाली गरेको आरोप पनि लगानीकर्ताहरुले लगाएका थिए ।
राष्ट्र बैंकलाई बुझाएको पूँजी वृद्धि योजनालाई पाखा लगाएर लाभांस घोषणा र पारित गराउन सकेका बिकेले राष्ट्र बैंकको निर्णयलाई हुकुमी भन्दै आलोचना पनि गरे । तर उनले आफ्नो बैंकले राष्ट्र बैंकको पूँजी बृद्धि योजना आगामी दुई बर्ष भित्रमा पुरा गर्ने भन्दै त्यसका लागि जोर जबरजस्ति नमान्ने घोषणा गरे ।
एभरेष्ट बैंक बिकेको एकल निर्णयबाट चल्ने गरेको र उसँग मर्जमा जाँदा आफ्नो सबै अस्तित्व गुमाउनुपर्ने भएकाले अरु बाणिज्य बैंकका संचालकहरु एभरेष्टसंग मर्ज वा एक्विजिशनमा जान अनिच्छुक रहेको बताईन्छ । तर बिकेले एक वा दुईजना संचालकहरु मर्ज वा एक्विशिजन भएर आउने बैंकका लाई दिन सकिने लचकता पनि प्रदर्शन गरे । उनको सबैभन्दा ठूलो चिन्ता कर्मचारी मिलानमा देखियो ।
बिकेले मर्जर र एक्विजिशनबारे लामो भाषण गरे पनि साधारणसभामा उपयुक्त बैंकसँग मर्ज वा एक्विजिशन गर्ने प्रस्तावै थिएन ।
पूँजी बृद्धिका लागि एभरेष्टले तीन वटा विकल्पलाई अघि सार्ने उनले बताए । मर्जर, प्रिमियममा हकप्रद वा प्रिमियममा थप शेयर निष्काशन (एफपीओ) मार्फत चुक्ता पूँजी ८ अर्ब पुर्याउने योजना उनले अघि सारे ।
पूँजी धेरै हुनु भन्दा बैंकको आम्दानी धेरै हुदा मात्र बैंक बलियो हुने बताएका बिकेले पूँजी बढाए पछि बैंकहरुको व्यवसाय खस्किन सक्ने तर्क गरे ।
बिकेले मर्जर र एक्विजिशनबाट पूँजी बृद्धिको संभावना कमजोर रहेको संकेत गर्दै प्रिमियममा हकप्रद वा प्रिमियममा थप निकाशन नै बलियो संभावना रहेको औल्याए । तर आगामी बर्ष पनि बोनस शेयरबाटै पूँजी बृद्धि गर्ने कुरामा भने अनिच्छा नै देखियो ।
उनले एभरेष्ट बैंकमा कर्मचारी युनियनको दादागिरी चलेको भन्दै आफ्नो लिखित मन्तब्यमै चर्को आलोचना गरेका छन् ।
भारतीय साझेदार पन्जाब नेशनल बैंकसँग केही मतभेद भएको कुरा चर्चामा रहे पनि उनले त्यसलाई नकार्दै आफुहरुबीच कुनै मतभेद नरहेको र कुनै काममा मतभेद देखिए त्यस्तो कामै छाड्ने गरिएको खुलासा गरे ।
साधारण सभाले ३० प्रतिशत बोनस शेयर र ५ प्रतिशत नगद लाभांस दिने प्रस्तावलाई पारित गरेको छ । एभरेष्ट बैंकले ३० प्रतिशत बोनस वितरण गरेपछि चुक्ता पूँजी दुई अर्ब ६२ करोड पुगेको छ भने स्वतन्त्र जगेडा कोषमा दुई अर्ब रहेको छ ।
