सरकार परिवर्तनको चर्चाले गत साता सुस्ताएको शेयरबजार यो साता लगातार दुई दिन झण्डै दोहोरो अंकले उकालो लागेको छ । आइतबार ९.५८ अंकले उकालो लागेको नेप्से सोमबार १०.२१ अंकले बढेको छ । कारोबारमा आएका सबै समुह सकारात्मक रहेपछि बजार दोहोरो अंकले उकालो लागेको छ भने कारोबार रकम समेत बढेर एक अर्बको हाराहरीमा पुगेको छ । अघिल्लो दिन जस्तै सोमबार पनि एनबी बैंक र एनआइसी एशिया बैंकको शेयरमुल्य बढेर उच्च कारोबार भएको छ ।

तत्काल सरकार परिवर्तन नहुने र यहि सरकारले नै आगामी आर्थिक बर्षको लोकप्रिय बजेट सार्वजनिक गर्ने निश्चित भएपछि लगानीकर्तामा आत्मविश्वास बढेको छ । सरकारले आइतबार मात्रै सार्वजनिक गरेको नीति तथा कार्यक्रममा पुँजीबजार विस्तार, विकास र सुधारका कार्यक्रम समेत आएपछि बजार थप सकारात्मक बनेको हो ।

वाणिज्य बैंकको दबदबा रहेको बजारमा नेप्से १०.२१ अंकले उक्लिएर १४८२.९० विन्दुमा पुगेको छ । १३२ कम्पनीको कारोबार भएको बजारमा ९९ करोड ९२ लाख रुपैयाँ बराबरको शेयर किनबेच भएको छ ।अघिल्लो कारोबारको तुलनामा कारोबार रकम पनि झण्डै ६ करोड रुपैयाँले बढेको छ । वाणिज्य बैंक समुहको ८ अंक बढीले उक्लिएको बजारमा यो समुहको मात्रै करिब ५३ करोड रुपैयाँ बराबरको शेयर खरिदबिक्री भएको छ । बजारमा कारोबारमा आएका सबै समुहमा हरियाली छाएपछि बजार थप उचाइमा पुगेको हो।

यसदिन नेपाल बंगलादेश बैंकको सर्वाधिक कारोबार भएको छ । एनबी बैंकको १ लाख ६२ हजार कित्ता शेयर ११ करोड २० लाख रुपैयाँ बराबरमा किनबेच भएको छ । आइतबार यो बैंकको २ लाख १३ हजार कित्ता शेयर १४ करोड २० लाख रुपैयाँ बराबरको शेयर किनबेच भएको थियो ।

विभिन्न बैंकहरुसँग मर्जरको चर्चा चलिरहेको बैंकको एक्कासी हकप्रद दिएर आफै पुँजी पुर्याउने योजनामा रहेको हल्ला बजारमा चलेपछि यो बैंकको शेयर कारोबार एकाएक बढेको छ । हकप्रदको चर्चाले बैंकको शेयरमुल्य समेत बढेको छ । अर्कातर्फ एनबी बैंकको तेस्रो त्रैमासको रिर्पोट समेत राम्रो आउने आँकलनमा लगानीकर्ता देखिएका छन् ।

उता २५ प्रतिशत हकप्रद शेयरको आह्वान पत्र प्रकाशित गर्नुका साथै तेस्रो त्रैमासमा ७५ करोड खुद नाफा सहितको विवरण सार्वजनिक गरेपछि एनआइसी एशिया बैंकको पनि शेयरमुल्य बढेर कारोबार भएको छ । यो बैंकको ७ करोड ४२ लाख रुपैयाँ बराबरको शेयर किनबेच भएको छ । आइतबार एशिया बैंकको १ लाख २९ हजार कित्ता शेयर झण्डै १२ करोड रुपैयाँमा खरिदबिक्री भएको थियो । हकप्रद शेयर प्रयोजनका लागि वैशाख ३१ गते बैंकको बुक क्लोज हुने भएकाले पनि कारोबार उच्च भएको हो ।

यसदिन ग्लोबल आइएई बैंकको पनि ४ करोड बढीको कारोबार भएको छ । नेपाल लाइफ, फस्ट माइक्रो, सिटिजन्स, एभरेष्ट र नेपाल बैंकको पनि ३ करोड बढीको कारोबार भएको छ ।

सोमबारको शेयर बजारमा हामा मर्चेन्ट र एनसिएम क्यापिटलको शेयर मुल्य शेयरमुल्य सबैभन्दा धेरै दश प्रतिशतले बढेको छ । यसपछि नमस्ते वित्तिय संस्था, रिलायन्स लोटस, काक्रे विहार विकास बैंकको पनि दश प्रतिशतकै हाराहारीमा शेयरमुल्य बढेको छ । यसदिन सप्तकोषी डेभलपमेन्ट बैंकका लगानीकर्ताले सबैभन्दा धेरै गुमाएका छन् । यसपछि साझा विकास, नेशनल हाइड्रो, महाकाली विकास र रिडी हाइड्रो लगायतका कम्पनी गुमाउनेमा परेका छन् ।

....................................................................................................................................................................

....................................................................................................................................................................

मेरो लगानी अब सबै स्मार्टफोनमा ! एण्ड्रोइड मोवाइल एप्सका लागि यहाँ क्लिक गर्नुहोस् । एप्पलको आइफोन तथा आइप्याडका लागि यहाँ क्लिक गर्नुहोस् । तपाईँ मेरो लगानीका प्रत्येक अपडेट फेसबुक, ट्वीटर र गुगल प्लस मार्फत पनि पाउन सक्नुहुन्छ ।

....................................................................................................................................................................

जलविद्युत आयोजनामा गर्ने हैन त लगानी ?