धमाधम निक्षेपको ब्याजदर बढाउने प्रतिस्पर्धामा उत्रिएका बैंकहरुले अर्कातर्फ कर्जाको ब्याजदर समेत बढाउन थालेको छन् । बैंकहरुले सेयर कर्जाको ब्याज दर बढाएर १५ प्रतिशतसम्म पुर्याएका छन् ।
बजार घटिरहेको बेलामा सेयर कर्जाको ब्याजदर समेत बढ्न थालेपछि यसको प्रत्यक्ष असर सेयर बजारमा परेको लगानीकर्ता तथा ब्रोकरहरुको भनाई छ ।
चालु आर्थिक वर्षको कात्तिकसम्म सेयर कर्जा साढे ५ प्रतिशत बढेर ४२ अर्ब ६९ करोड रुपैयाँ पुगेको छ । ४ महिनामा बैंक तथा वित्तीय संस्थाले २ अर्ब २१ करोड ५२ लाख रुपैयाँ सेयरमा लगानी गरेको नेपाल राष्ट्र बैंकले जनाएको छ ।
बैंकहरुले ठूला ठूला विज्ञापन गरेर १२ प्रतिशतसम्म ब्याजदरमा मुद्धती निक्षेप उठाउन थालेका छन् । अर्कातर्फ नयाँ सरकार कहिले गठन हुने भन्ने राजनीतिक अन्योलताले समेत बजारलाई अस्थिरतता तर्फ धकेलेको छ ।
यता राष्ट्र बैंकले भने बजारमा ३३ अर्ब रुपैयाँ बराबरको तरलताको रहेको बताउँदै आएको छ ।
मंगलबारको नेप्से परिसूचकमा २०.६४ अंकको गिरावट आएको छ । १४६७.६८ बिन्दुमा खुलेको बजारमा करिब २० मिनेटमा सामान्य उकालो लागेपनि त्यसपछि अन्त्यसम्म नै बजार घट्दा नेप्से १.४१ प्रतिशतले घटेको छ ।
२० अंकले घटेको बजारमा महुली सामूदायिक लघुवित्त कम्पनीका सेयरधनीले भने १० प्रतिशतले कमाएका छन् । आईतबार पनि १० प्रतिशतले सेयरमूल्य बढेको कम्पनीको पछिल्लो केही दिनयता १० प्रतिशतका दरले मूल्य बढ्दै आएको छ । अन्य १२ कम्पनीको सेयरमूल्य भने दुई प्रतिशतले पनि बढेको छैन । वल्र्ड मर्चेन्ट, महिला सहयात्रा, नेपाल टेलिकम, छ्याङ्दी हाईड्रोपावर कम्पनी र ग्रीन डेभलपमेन्ट बैंकको सेयरमूल्य एक प्रतिशत बढीले बढेको छ ।
मंगलबार १५९ कम्पनीको १० लाख ३८ हजार २९८ कित्ता सेयर ५४ करोड दुई लाख ९१ हजार रुपैयाँमा खरिद विक्री भएका छन् । आईतबारको तुलनामा कारोबार रकम एक करोड रुपैयाँले घटेको छ । मंगलबार 'क' बर्गको कम्पनीको कारोबार मापन गर्ने सेन्सेटिभ इन्डेक्स ४.१६ अंकले घटेर ३०४.८५ बिन्दुमा झरेको छ । समग्र बजार पूँजीकरण १६ खर्ब ८२ अर्ब रुपैयाँमा घटेको छ ।
कारोबारमा आएका १० समूहमध्ये अन्य समूह ६.९४ अंकले बढ्यो भने अन्य सबै समूहमा गिरावट आएको छ । सबैभन्दा बढी बीमा समूह १३८.८१ अंकले घटेको छ । विकास बैंक, हाईड्रोपावर, उत्पादन र माइक्रोफाइनान्स समूह ३० अंक बढीले झरेका छन् ।
यसदिन स्टार्ण्डड चार्टर्ड बैंकको सबैभन्दा बढी आठ करोड ३३ लाख रुपैयाँ तथा नेपाल टेलिकमको झण्डै ७ करोड रुपैयाँको ८२ हजार ११० कित्ता सेयर किनबेच भएको छ । एभरेष्ट बैंक र चिलिमे हाइड्रोपावरको दुई करोड बढीको कारोबार हुँदा नेपाल बैंक, प्रभु बैंक, बुटवल पावर, एनसीसी बैंक, इन्भेष्टमेन्ट बैंक र नेपाल लाइफ इन्स्योरेन्स कम्पनीको एक करोड बढीको सेयर खरिद विक्री भए ।
मंगलबार प्राेगेसिभ फाइनान्सका सेयरधनीले सबैभन्दा बढी ६.७२ प्रतिशतले घाटा व्यहाेरेका छन् । सांग्रीला डेभलपमेन्ट बैंक, अरूण फाइनान्स, भागर्व विकास बैंकका सेयरधनीले पाँच प्रतिशत बढीले गुमाएका छन् ।
