नेको इन्स्योरेन्सले गत आर्थिक बर्ष २०७४/७५ मा ३१.९० प्रतिशतले खुद बीमा शुल्क आर्जन बढाएर ९८ करोड ५० लाख रुपैयाँ संकलन गरेको छ । गत बर्षको यसै अवधिमा कम्पनीले ७४ करोड ६८ लाख रुपैयाँ खुद बीमा शुल्क आर्जन गरेको थियो ।

खुद बीमा शुल्कबाट प्राप्त हुने रकम बढेसँगै नेकोको गत बर्ष ८ करोड २४ लाखले खुद नाफा बढेर २९ करोड १० लाख पुगेको छ । जुन अघिल्लो बर्षको तुलनामा ३९.५७ प्रतिशतले धेरै हो ।

अघिल्लो आर्थिक वर्षको यसै अवधिमा कम्पनीले २० करोड ८५ लाख रुपैयाँ खुद नाफा गरेको थियो । 

समीक्षा अवधिमा कम्पनीले ७१ करोड २८ लाख रुपैयाँबाट ५० प्रतिशत हकप्रद जारी गरेर चुक्ता पूँजी वृद्धि गरेकाे थियाे । एक अर्ब १९ करोड ६२ लाखमा पूँजी बढेसँगै कम्पनीको प्रतिसेयर आम्दानीमा भने गिरावट आएको छ । अघिल्लो बर्ष रहेको इन्योरेन्सको २९ रुपैयाँ २५ पैसा प्रतिसेयर आम्दानी २४ रुपैयाँ ७४ पैसामा झरेको छ ।

कम्पनीको प्रतिसेयर नेटवर्थ १६८ रुपैयाँ ६० पैसा तथा मूल्य आम्दानी अनुपात २२.५५ गुणा बढी रहेको छ ।

कम्पनीको अघिल्लो बर्ष २० करोड ६९ लाख रहेको जगेडा कोष १३ करोड १० लाख बढेर ३३ करोड ७९ लाख पुगेको छ । उसको बीमा कोषमा ४२ करोड ९८ लाख रुपैयाँ, महाविपत्ती कोषमा तीन करोड ९१ लाख रुपैयाँ सञ्चित छ ।

यस अवधिमा कम्पनीले ४२ करोड २६ लाख रुपैयाँ खुद दाबी भुक्तानी गरेको छ भने १७ करोड ४१ लाख मात्र भुक्तानी हुन बाँकी छ ।

दुई लाख ६९ हजार ८२२ वटा बीमा लेख जारी गरेको कम्पनीले गत बर्ष एक अर्ब ६६ करोड ९ लाख रुपैयाँ कुल बीमा शुल्क संकलन गरेको छ । अघिल्लो आर्थिक वर्षमा यस्तो संकलन एक अर्ब ३६ करोड २३ लाख रहेको थियो । कम्पनीमा नविकरण गरिएको बीमालेख संख्या ३१ हजार ७६६ रहेको छ ।

गत बर्षमा कम्पनीले चार हजार ५७६ दाबी वापत एक ७३ करोड ७७ लाख रुपैयाँ दाबी भुक्तानी गरेको छ । कम्पनीले एक हजार २७० दाबी वापत परेको ४० करोड ४९ लाख रुपैयाँ दाबी भुक्तानी गर्न बाँकी छ ।