‘नागरिकको सुरक्षा र ज्यान जोगाउने विषय सरकारको अनिवार्य दायित्व हो र यो दायित्व पूरा गर्न स्रोत–साधनको अभाव हुनु हुँदैन। स्रोत साधनको जोहो गर्न समितिले पनि सरकारलाई निर्देश गरोस्,’ मन्त्री लामिछानेले आग्रह गर्दै भने ।
उनले थपे, ‘हामीले निरन्तर बजेट छैन भन्ने सुन्दै आएका छौं। तर,कति छैन र कसरी जुटाउन सकिन्छ भन्नेबारे पर्याप्त छलफल हुँदैन’। समितिका छलफल त्यसतर्फ पनि केन्द्रित हुने अपेक्षा गर्दै मन्त्री लामिछानेले गृह मन्त्रालयले त्यसबारे खुलेर छलफल गर्न, आवश्यक स्रोतको जोहो गर्न र भएका कमीकमजोरी सच्याउन तयार रहेकाे पनि बताए।
क्षति न्यूनीकरणको पूर्वतयारी भन्दा विपद्पछिको व्यवस्थापनमा मात्रै केन्द्रित हुने प्रवृत्तिका कारण पनि स्रोतमा भार परिरहेको उनको भनाइ थियो। पूर्वतयारीमा सचेत र सजग हुन सके क्षति स्वतः घट्ने भएपनि पूर्वतयारीमै चुक्दा विपद् व्यवस्थापनमा सधैं बजेटको सन्दर्भ आउने गरेको उनको भनाइ थियो।
