स्रोतका अनुसार पौडेल र ओलीमात्र होइन, कांग्रेस सभापति शेरबहादुर देउवाबीच नयाँ गभर्नर कसलाई बनाउने भन्ने बारेमा सिफारिस समिति गठन हुनु अघि नै मोटामोटी सहमति भइसकेको थियो । त्यही सहमति अनुसार सिफारिस समितिले एकजना डेपुटी गभर्नरसहित ३ जनाको नाम सिफारिस गर्दैछ ।
सिफारिस समितिको संयोजकमा अर्थमन्त्री पौडेल तथा सदस्यहरुमा पूर्व गभर्नर विजयनाथ भट्राई र देउवा निकट अर्थशास्त्री विश्व पौडेल सदस्य रहेका छन् ।
प्रधानमन्त्री निकट स्रोतका अनुसार नयाँ गभर्नर पनि अधिकारी नै हुनेछन् । तर उनी महाप्रसाद नभएर प्राध्यापक डा. शिवराज अधिकारी हुन् ।
जो हाल राष्ट्रिय योजना आयोगका उपाध्यक्ष छन् । पदीय हिसाबले गभर्नर भन्दा योजना आयोगको उपाध्यक्ष माथि भए पनि कार्यकारी महत्वको आधारमा गभर्नर पद महत्वपूर्ण मानिन्छ । यस अघि डा. युवराज खतिवडा पनि योजना आयोगको उपाध्यक्ष छोडेर गभर्नर बनेका थिए, अहिले उनकै पहलमा अधिकारीलाई गभर्नर बनाउन लागिएको स्रोतको दावी छ ।
पाल्पाका अधिकारीले त्रिवि अर्थशास्त्र विभागको प्रमुखको रुपमा काम गरिसकेका छन् । ‘भवितव्य भए अर्कै कुरा अन्यथा अबको गभर्नर अधिकारी नै हो’ प्रधानमन्त्री निकट स्रोतले मेरो लगानीसँग भन्यो ।
