गत वर्षको असार ३१ गते दीपक खडकाले सिँचाई मन्त्रालयको मन्त्रीको रुपमा कार्यभार सम्हाल्दा उर्जा जलस्रोत तथा सिँचाई विभागको महानिर्देशक थिए-संजिव बराल । 

त्यसयता एक वर्षको अवधिमा मन्त्री खडकाले ४ पटकसम्म महानिर्देशक परिवर्तन गरिसकेका छन ।

उनी मन्त्री हुनुभन्दा करिब सय दिन अघि मात्र महानिर्देशक बनेका संजिव बराल कार्यरत थिए । उनलाई मन्त्री खड्काले मंसिर १८ गते हटाएर देवराज निरौलालाई महानिर्देशक बनाए । तर, उनलाई नियुक्त भएको सय दिन पुगेकै दिन फागुन २७ गते मन्त्रालय फिर्ता बोलाएर फेरि संजिब बराललाई नियुक्त गरे । उनलाई ५ महिना पनि पुग्न नदिई गत साउन १८ गते मित्र बराललाई महानिर्देशक बनाएका छन् ।

मन्त्री खडकाले यति छिटो छिटो महानिर्देशक परिवर्तन किन गरिरहेका छन ? विभागका कर्माचारीहरु नै आश्चर्यमा परेका छन् । ‘मन्त्री आएपछि आफू अनुकूलको महानिर्देशक ल्याउनु अनौठो होइन, विगतमा पनि त्यस्तो हुँदै आएको छ । तर, एउटै मन्त्रीले एक वर्ष नहुँदै चार चार पटक महानिर्देशक परिवर्तन गर्नु सामान्य घटना होइन’ विभागका एक अधिकारीले मेरो लगानीसँग भने ।

उनका अनुसार मन्त्री खड्काले कर्मचारी भर्नादेखि आयोजनाहरुको साधन सञ्चालन समेत चलखेल गर्न खोज्ने र त्यसो गर्न नपाएपछि उनी महानिर्देशकलाई धम्काउँदै सरुवा गर्छन् ।

‘मन्त्रीले महानिर्देशकलाई घरकै कामदार जस्तो यो गर र त्यो गर भन्दै मनपरि आदेश दिने गरेपछि कस्लाई काम गर्न सक्छ, महानिर्देशकहरुको मात्र होइन, मन्त्रालयका हरेक उच्च पदस्त कर्मचारीमा खड्काले आतँक मच्चाएका छन् । व्यापारीहरु मन्त्री धेरै पटक भएका छन्, तर कर्मचारीहरुलाई यस्तो सताउने मन्त्री त अहिलेसम्म भोगिएको थिएन, अरु मन्त्रालयहरुले पनि भोगेका थिएनन् होला’ मन्त्रालयका एकजना सहसचिवले भन्छन् ।

उनका अनुसार मन्त्री परिषद् परिवर्तन हुने हल्लाले उनी हटाइन्छन् कि भनेर मन्त्रालयका कर्मचारीहरुमा अलिकति आश पलाएको छ । ‘घोषित रुपमा कस्ले गर्छ र, अघोषितरुपमा चाँहि उनी हटेको दिन उर्जा मन्त्रालयका धेरै कर्मचारीहरुले भोज खान्छन्, स्वतन्त्रताको महसुस गर्छन,’ उनको भनाइ छ । कथंकदाचित कांग्रेस भित्रको गुट मिलाउन भन्दै उनको थमौती भए के हुन्छ , उनी भन्छन—त्यस्तो भयो भने त आकास खस्छ, उर्जा क्षेत्र अस्तव्यस्त हुन्छ ।