गत असोज १८ गते यताको अविरल बर्षा तथा बाढी पहिरोका कारण भएको क्षतिमा निर्जीवन बीमा कम्पनीहरूमा परेका कूल ७९० वटा प्रारम्भिक बीमा दाबीको कूल करिव ४ अर्ब १८ करोड २६ लाख रुपैयाँ प्रारम्भिक दाबी रकममध्ये हालसम्ममा कूल ९६ वटा दाबीको कूल दाबी रकम ११ करोड १५ लाख रुपैयाँ बीमितहरूलाई भुक्तानी भएको बीमा प्राधिकरणले जनाएको छ।

विभिन्न १३ वटा निर्जीवन बीमा कम्पनी र २ वटा लघु निर्जीवन बीमा कम्पनीहरूबाट प्राप्त अद्यावधिक तथ्याङ्क अनुसार, निर्जीवन बीमा कम्पनीहरूबाट सम्पत्ति बीमातर्फ ४१७ वटा प्रारम्भिक दाबीको दाबी रकम करिव ३ अर्ब ५८ करोड ३२ लाख रुपैयाँमध्ये कूल ३३ वटा बीमा दाबीको करिव ९ करोड ६४ लाख रुपैयाँ र इञ्जिनीयरिङ तथा ठेक्का जोखिम बीमातर्फ १०७ वटा बीमा दाबीको करिव ५१ करोड ५७ लाख रुपैयाँमध्ये कूल ७ वटा दाबीको करिव ९ लाख रुपैयाँ बीमितहरूलाई भुक्तानी भएको छ ।

यसैगरी, कृषि तथा बाली बीमातर्फ २१० वटा बीमा दाबीको करिव ४ करोड १४ लाख रुपैयाँ दाबी रकममध्ये कूल ४२ वटा दाबीको करिव १९ लाख रुपैयाँ, मोटर बीमा (निजी) तर्फ ४० वटा बीमा दाबीको करिव २ करोड ८२ लाख रुपैयाँ दाबी रकममध्ये कूल १२ वटा दाबीको करिव १ करोड २० लाख र सामुद्रिक बीमातर्फ ४ वटा बीमा दाबीको करिव ११ लाख रुपैयाँ प्रारम्भिक बीमा दाबी रकममध्ये २ वटा दाबीको करिव ३ लाख रुपैयाँ दाबी रकम बीमितहरूलाई भुक्तानी भएको अद्यावधिक तथ्याङ्क रहेको छ।

यस्तै, मोटर बीमा (सार्वजनिक) तर्फ १० वटा दाबीको करिव १ करोड १९ लाख रुपैयाँ र लघुबीमातर्फ २ वटा दाबीको करिव १२ लाख रुपैयाँ बीमा दाबी रकमको भुक्तानी प्रक्रिया भने हालसम्म शुरू नभएको अद्यावधिक जानकारी निर्जीवन बीमा कम्पनीहरूबाट प्राप्त भएको बीमा प्राधिकरणले जनाएको छ ।