काठमाडौंको भृकुटीमण्डपमा सम्पन्न महाधिवेशनको मतपरिणामअनुसार ओलीले १ हजार ६ सय ६३ मत प्राप्त गरेका हुन् । उनका निकटतम प्रतिद्वन्द्वी ईश्वर पोखरेलले ५ सय ६४ मत मात्र प्राप्त गरे ।
कुल २ हजार २ सय २७ मत खसेको निर्वाचनमा ओलीले भारी मतान्तरले विजय हासिल गरेका हुन् । यो विजयसँगै ओलीले पार्टी नेतृत्वमा ‘ह्याट्रिक’ पूरा गरेका छन् । यसअघि २०७१ मा नवौँ महाधिवेशनबाट पहिलो पटक र २०७८ मा दसौँ महाधिवेशनबाट दोस्रो पटक अध्यक्ष निर्वाचित भएका ओलीले यसपटक पनि स्पष्ट बहुमत प्राप्त गरे । ओलीको प्यानलबाट महासचिवमा शंकर पोखरेल निर्वाचित भए।
उपाध्यक्षहरूमा पृथ्वीसुब्बा गुरुङ, विष्णु पौडेल र रामबहादुर थापा विजयी हुनुभयो भने गोकर्ण विष्ट र रघुजी पन्त पनि उपाध्यक्षमा निर्वाचित भए । पदाधिकारीका अधिकांश पदमा ओली पक्षकै उम्मेदवारहरूले जित हासिल गरेको छ । निर्वाचित भएलगत्तै ओलीले महाधिवेशन स्थलमै नेता–कार्यकर्तासँग खुशी साटासाट गरेका थिए । पार्टीभित्र एकता कायम गर्दै देशलाई समृद्धिको बाटोतर्फ अघि बढाउने संकल्प व्यक्त गर्दै ओलीले आफ्नो नेतृत्वलाई महाधिवेशन प्रतिनिधिहरूले बलियो समर्थन गरेको बताए।
