६५ वर्षीय सिंहको शव आइतबार जिल्लाको गोरुसिंगेस्थित जंगलमा फेला परेको प्रहरीले जनाएको छ ।
जिल्ला प्रहरी कार्यालय कपिलवस्तुका प्रमुख, प्रहरी उपरीक्षक (एसपी) मनोहर भट्टका अनुसार सिंहको शव पूर्व-पश्चिम राजमार्गबाट करिब आठ किलोमिटर भित्र जंगलको खोँचमा भेटिएको हो ।
सिंह गत शुक्रबार दिउँसो करिब २ बजे कपिलवस्तु नगरपालिका–३ स्थित आफ्नै घरबाट निस्किएका थिए । उनी घरबाट निस्किएपछि परिवारको सम्पर्कमा नआएपछि खोजी कार्य तीव्र पारिएको थियो । खोजीकै क्रममा उनीले प्रयोग गर्ने लु प्र ०१०१३ प ७९७० नम्बरको मोटरसाइकल जंगल क्षेत्रमा फेला परेको थियो । मोटरसाइकल भेटिएपछि प्रहरीले सोही क्षेत्रलाई केन्द्रित गरी सर्च अपरेसन चलाएको थियो ।
सिंहको खोजीका लागि नेपाल प्रहरीले भैरहवास्थित गौतमबुद्ध विमानस्थलबाट तालिमप्राप्त कुकुरसमेत मगाएर परिचालन गरेको थियो । लामो समयको प्रयासपछि आइतबार दिउँसो उनको शव फेला परेको हो ।
घटनाको प्रकृति र मृत्युको कारणबारे प्रहरीले अनुसन्धान सुरु गरिसकेको छ । सिंह कपिलवस्तुका प्रभावशाली नेता मानिन्छन । उनको निधनले जिल्लाको राजनीतिक वृत्त र स्थानीय स्तरमा शोक छाएको छ । शवलाई पोस्टमार्टमका लागि अस्पताल लैजाने तयारी भइरहेको प्रहरीले जनाएको छ ।
