मेटलाईफले नेपाल बीमा प्राधिकरणलाई उपलब्ध गराएको विवरण अनुसार, यो बीमा योजनाले कर्मचारीहरूको जीवनमा आइपर्न सक्ने विभिन्न जोखिमहरूलाई समेटेको छ। सम्झौतामा 'सामूहिक जीवन बीमा' र 'सामूहिक व्यक्तिगत दुर्घटना बीमा' गरी दुईवटा महत्त्वपूर्ण पक्षहरू समावेश छन्।
के-के छन् सुविधाहरू ?
सम्झौता अनुसार बैंकका कर्मचारीको सेवा अवधिभित्र कुनै पनि कारणले मृत्यु भएमा मेटलाईफले बीमांक रकम भुक्तानी गर्नेछ। यसका अतिरिक्त दुर्घटनाका कारण हुने क्षतिलाई न्यूनीकरण गर्न विभिन्न 'राइडर' (थप सुविधा) हरू पनि राखिएको छ। जसमा:
-
दुर्घटनाजन्य मृत्यु लाभ: दुर्घटनाका कारण मृत्यु भएमा अतिरिक्त रकम प्रदान गरिने।
-
अङ्गभङ्ग र शक्ति गुमेको अवस्था: दुर्घटनाका कारण अङ्गभङ्ग भएमा, दृष्टि, श्रवण वा बोल्ने शक्ति गुमेमा आर्थिक लाभ।
-
पूर्ण तथा स्थायी अशक्तता: कर्मचारी पूर्ण रूपमा अशक्त भएमा दिइने विशेष सुविधा।
-
उपचार खर्च शोधभर्ना: दुर्घटना भएर अस्पताल भर्ना हुनुपरेमा लाग्ने खर्चको शोधभर्ना (Reimbursement)।
-
साप्ताहिक अशक्तता लाभ: दुर्घटनाका कारण काममा फर्कन नसकेको अवस्थामा साप्ताहिक रूपमा आर्थिक सहायता।
५ सेप्टेम्बरदेखि कार्यान्वयन
मेटलाईफका अनुसार यो बीमा योजना ५ सेप्टेम्बर २०२५ देखि लागू भइसकेको छ। एक वर्षको अवधिको लागि गरिएको यो सम्झौताले सरकारी स्वामित्वको ठूलो बैंक राष्ट्रिय वाणिज्य बैंकका कर्मचारीहरूको मनोबल उच्च राख्न र सामाजिक सुरक्षा प्रदान गर्न मद्दत पुग्ने विश्वास गरिएको छ।
बीमा गरिएका कर्मचारीको मृत्यु भएको खण्डमा बीमा बापतको रकम निजले इच्छाएको व्यक्ति (Beneficiary) वा कानूनी हकवालाले प्राप्त गर्ने व्यवस्था गरिएको मेटलाईफले जनाएको छ।
मेटलाईफले नेपालमा लामो समयदेखि संस्थागत तथा व्यक्तिगत बीमा सेवा प्रदान गर्दै आएको छ भने राष्ट्रिय वाणिज्य बैंकले आफ्ना कर्मचारीहरूको हितका लागि यस्ता योजनाहरूलाई प्राथमिकता दिँदै आएको छ।
