पछिल्लो एक महिनाको शेयर बजारमा समग्र कारोबार रकम र परिसूचकमा संकुचन देखिए पनि लगानीकर्ताको आकर्षण भने जलविद्युत (हाइड्रोपावर) उपसमूहमा अस्वाभाविक रूपमा केन्द्रित भएको देखिएको छ।

नेपाल स्टक एक्सचेन्ज (नेप्से) को पछिल्लो भदौको मासिक प्रतिवेदन अनुसार बजारमा भएको कुल कारोबार रकमको झण्डै आधा हिस्सा (करिब ४९ प्रतिशत) जलविद्युत कम्पनीहरूले एक्लै ओगटेका छन्। बजारमा सूचीकृत दर्जनभन्दा बढी क्षेत्रहरूमध्ये लगानीकर्ताको सम्पूर्ण ध्यान हाइड्रोपावरमा खनिनुलाई यस महिनाको सबैभन्दा रोचक प्रवृत्तिका रूपमा हेरिएको छ।

समीक्षा महिनामा नेप्सेमा कुल ८६ अर्ब ९ करोड ९३ लाख रुपैयाँ बराबरको शेयर खरिद–बिक्री भएको छ। जुन अघिल्लो महिनाको ९५ अर्ब ३५ करोड ३३ लाख रुपैयाँको तुलनामा ९.७० प्रतिशतले कम हो। यसरी बजारको समग्र कारोबार खुम्चिँदा पनि हाइड्रोपावर समूहमा मात्रै ४२ अर्ब ४ करोड ११ लाख रुपैयाँको कारोबार भएको छ। महिनाभर कारोबार भएका कुल २२ करोड ५३ लाख कित्ता शेयरमध्ये ११ करोड १५ लाख कित्ताभन्दा बढी शेयर जलविद्युत कम्पनीहरूकै मात्र किनबेच भएका छन्।

यस महिनाको अर्को उल्लेखनीय पक्ष भनेको क्षेत्रगत कारोबारमा देखिएको भारी फेरबदल हो। अघिल्ला महिनाहरूमा उच्च उतारचढाव र सट्टेबाजीका लागि रोजाइमा पर्ने गरेको फाइनान्स समूहको कारोबार यस अवधिमा ठीक आधा अर्थात् ५० प्रतिशतले घटेर २ अर्ब ५८ करोड रुपैयाँमा झरेको छ। त्यस्तै विकास बैंक समूहको कारोबार ३१.६० प्रतिशत, वाणिज्य बैंकको १९.८९ प्रतिशत र होटल तथा पर्यटनको कारोबार १८.२५ प्रतिशतले घटेको छ। यसको ठीक विपरीत, तुलनात्मक रूपमा सुस्त मानिने म्युचुअल फण्डको कारोबारमा ७२.४१ प्रतिशतको अप्रत्याशित उछाल आएको छ भने निर्जीवन बीमा कम्पनीहरूको कारोबार ३५.८५ प्रतिशत र उत्पादन तथा प्रशोधन समूहको कारोबार १७.५४ प्रतिशतले बढेर १२ अर्ब ७० करोड रुपैयाँ पुगेको छ।

कारोबार रकमसँगै यस महिना समग्र बजार परिसूचकमा पनि केही सुस्तता देखिएको छ। महिनाभरको उतारचढावबीच नेप्से परिसूचक अधिकतम २,६४१.८३ विन्दुसम्म पुगेको र न्यूनतम २,५१३.४२ विन्दुसम्म ओर्लिएको थियो। महिनाको अन्तिम कारोबार दिनसम्म आइपुग्दा नेप्से १.१९ प्रतिशतको सामान्य गिरावटसहित २,६१२.४३ विन्दुमा सीमित भएको छ। 'क' वर्गका ठूला कम्पनीहरूको मापक सेन्सेटिभ परिसूचक पनि ०.२३ प्रतिशतले घटेर ४६३.६८ विन्दुमा रोकिएको छ।

कुल २० कारोबार दिन सञ्चालन भएको यस अवधिमा १० लाख ५१ हजारभन्दा बढी पटक शेयर किनबेच भएका छन्। यस महिना दैनिक औसत कारोबार रकम ४ अर्ब ३० करोड रुपैयाँ कायम भएको छ, जुन अघिल्लो महिनाको ४ अर्ब ५४ करोडको तुलनामा ५.१९ प्रतिशतले कम हो। बजारमा आएको सामान्य गिरावटका कारण सूचीकृत कम्पनीहरूको कुल बजार पूँजीकरण पनि १.१२ प्रतिशतले घटेर ४४ खर्ब ९६ अर्ब ७२ करोड रुपैयाँ कायम भएको छ, जसले लगानीकर्ताहरू पछिल्लो समय नाफा सुरक्षित गर्दै आफ्नो लगानी हाइड्रोपावर र उत्पादनमूलक क्षेत्रतर्फ केन्द्रित गरिरहेको स्पष्ट संकेत गर्दछ।