तेस्रो तहको जलन उपचार सेवा प्रवाह गर्न आवश्यक दक्ष जनशक्ति तयार गर्ने उद्देश्यले तालिम सञ्चालन गर्न लागिएको हो।
तालिममा शल्य चिकित्सक, चिकित्सा विशेषज्ञ, शल्यकक्ष तथा सघन उपचार कक्षका नर्स र आकस्मिक सेवामा कार्यरत स्वास्थ्यकर्मी सहभागी हुनेछन्।
तालिममा जलन भएका बिरामीको आकस्मिक तथा शल्य उपचार, घाउ व्यवस्थापन, छाला प्रत्यारोपण, सघन उपचार, संक्रमण नियन्त्रण, पोषण र दुखाइ व्यवस्थापनलगायत विषयमा सैद्धान्तिक तथा प्रयोगात्मक अभ्यास गराइनेछ।
पहिलो समूहको तालिम कीर्तिपुर अस्पतालमा दुई चरणमा सञ्चालन हुनेछ। पहिलो चरण असोज ७ देखि ३० गतेसम्म र दोस्रो चरण कात्तिक ९ देखि १८ गतेसम्म चल्नेछ। पहिलो समूहमा नारायणी अस्पताल र कर्णालीको प्रदेश अस्पतालबाट चार–चार जना गरी आठ जना सहभागी हुनेछन्।
यसअघि आधारभूत जलन उपचारसम्बन्धी तालिमबाट १९९ जना र प्राथमिक जलन उपचारसम्बन्धी तालिमबाट ३६४ जनाले तालिम प्राप्त गरिसकेका छन्।
