लाभांश तथा वार्षिक साधारणसभाजस्तो शेयर मूल्यमा प्रत्यक्ष प्रभाव पार्ने संवेदनशील सूचना समयमै उपलब्ध नगराएको भन्दै नेप्सेले कम्पनीको कारोबार रोक्का गर्दै तीन कार्यदिनभित्र स्पष्टीकरण पेस गर्न निर्देशन दिएको हो।
नेप्सेको सूचीकरण शाखाद्वारा जारी पत्रअनुसार विन्ध्यावासिनी हाइड्रोपावरको सञ्चालक समितिको बैठक गत असोज २६ गते दिउँसो ३:३० बजे बसेको थियो। उक्त बैठकले वार्षिक साधारणसभा आह्वान, बुक क्लोज र लाभांश वितरणसम्बन्धी महत्त्वपूर्ण निर्णय गरेको थियो।
धितोपत्र मूल्यमा प्रभाव पार्ने यस्ता निर्णयहरू सोही दिन वा भोलिपल्ट कारोबार खुल्नुअगावै नेप्सेमा पेस गर्नुपर्ने कानुनी व्यवस्था छ। तर, कम्पनीले असोज २६ गते गरेको निर्णयको जानकारी अर्को दिन अर्थात् असोज २७ गते बेलुका ५:५९ बजे मात्र नेप्सेको अनलाइन प्रणाली (NOTS) मार्फत गराएको थियो।
धितोपत्र सूचीकरण विनियमावली, २०७५ को विनियम २२ (१) मा धितोपत्रको मूल्यमा प्रभाव पार्ने कुनै पनि सूचना, जानकारी तथा निर्णय भएमा सोही दिन वा भोलिपल्ट कारोबार खुल्नुअगावै सूचीकृत संस्थाले नेप्सेमा पेस गर्नुपर्ने बाध्यात्मक व्यवस्था छ। विन्ध्यावासिनी हाइड्रोपावरले उक्त विनियमको पालना नगरी पूरै एक दिनपछि मात्र बजार बन्द भएपछि सूचना पठाएको पाइएको हो।
यसरी विनियमको ठाडो उल्लङ्घन भएको ठहर गर्दै नेप्सेले धितोपत्र सूचीकरण विनियमावलीको विनियम १६ (१) (ख) बमोजिम मिति २०८३ असोज २८ गतेको निर्णयानुसार कम्पनीको शेयर कारोबार स्थगन गरेको जनाएको छ।
साथै, नेप्सेले कम्पनीलाई पत्र प्राप्त भएको मितिले ३ (तीन) कार्यदिनभित्र के–कति कारणले समयमै जानकारी दिन नसकिएको हो भनी स्पष्टीकरण पेस गर्न निर्देशनसमेत दिएको छ। नेप्सेका सहायक प्रबन्धक सुरेश जोशीद्वारा हस्ताक्षरित पत्रको बोधार्थ नियामक निकाय नेपाल धितोपत्र बोर्ड (सेबोन), सिडिएस एण्ड क्लियरिङ्ग लिमिटेड र नेप्सेका प्रमुख कार्यकारी अधिकृतको सचिवालयलाई समेत दिइएको छ।
पूँजी बजारमा भित्री कारोबार (इन्साइडर ट्रेडिङ) रोक्न तथा साधारण लगानीकर्तालाई सूचनाको समान पहुँच सुनिश्चित गर्न मूल्य संवेदनशील सूचना तत्काल सार्वजनिक गर्नुपर्ने नियम कडाइका साथ लागु गरिँदै आएको छ। कम्पनीले सन्तोषजनक स्पष्टीकरण पेस नगरेसम्म यसको शेयर कारोबार फुकुवा नहुने नेप्सेले जनाएको छ।
