केन्द्रीय बैंकले यसअघि जारी गरेर मिति समाप्त भएका ट्रेजरी बिलहरुको नवीकरण गर्न लागेको हो।
बैंकले बिक्री गर्न लागेको ९१ दिन अवधिको ४ अर्ब ३ करोड रुपैयाँ बराबरको ट्रजरी बिल २०७७ असार ९ गते परिपक्व हुनेछ भने १८२ दिन अवधिको ४ अर्ब ३० करोड रुपैयाँ बराबरको ट्रेजरी बिल २०७७ असोज ६ गते परिपक्व हुनेछ। त्यस्तै, ३६४ दिन अवधिको २ अर्ब रुपैयाँको ट्रेजरी बिल २०७७ चैत १० गते परिपक्व हुनेछ।
बोलकबोल मार्फत बिक्री गर्न लागेको उक्त ट्रेजरी बिलमा सोमबार मध्याह्न ३ बजेसम्म अनलाईन बिडिङ्ग प्रणाली मार्फत बोलकबोल गर्न सकिने केन्द्रीय बैंकले जनाएको छ। र्चैत ११ गते मंगलबार जारी हुने ट्रेजरी बिलको बोलकबोलमा बैंक तथा वित्तीय संस्था, संगठित संस्था तथा सर्वसाधारण नागरिक समेत सहभागी हुन सक्नेछन्।
बोलकबोलमा सबैभन्दा बढी मूल्य उल्लेख गर्ने संस्थालाई पहिलो प्राथमिकतामा राखेर क्रमैसँग आह्वान रकमसम्म ट्रेजरी बिलको बाँडफाँड गरिने राष्ट्र बैंकले जनाएको छ।
ट्रेजरी बिल एक वर्ष वा एक वर्षभन्दा कम अवधिको आन्तरिक ऋण उठाउन प्रयोग गरिने अल्पकालीन सरकारी ऋणपत्र हो। सरकारलाई आवश्यक पर्ने अल्पकालीन अवधिको स्रोत जुटाउन यो बिल बिक्री गरिन्छ।
राष्ट्र बैंकले यसअघि चैत ३ गते पनि ९१ दिन र १८२ दिन अवधिको ६ अर्ब रुपैयाँको ट्रेजरी बिल बिक्री गरेको थियो।
