हाल जीवन तथा निर्जीवन बीमा आफुले आर्जन गरेको बीमा व्यवसायको २० प्रतिशत पुनर्बीमा अनिवार्य नेपाल पुनर्बीमा कम्पनीमा गर्नुपर्ने व्यवस्था छ । उक्त व्यवस्थालाई निरन्तरता दिदै समितिले बाँकी हुन आउने सबै पुनर्बीमा व्यवसाय स्वदेशी पुनर्बीमकहरुलाई दिन निर्देशन दिएको हो ।
बीमा समितिको यो कदमकाे विरुद्ध चर्को आलोचना भइरहेको छ । तर पनि समितिले पछि नहट्ने संकेत गरेको छ । चौतर्फी आलोचना भएपछि समितिले मंसिर १३ गते एक विज्ञप्ती जारी गर्दै आफ्नो निर्णयबाट नहट्ने प्रष्ट पारेको हो ।
त्यस अनुसार नेपाल पुनर्बीमा कम्पनी र हिमालयन रिले नेपालमा सञ्चालनमा रहेको ३९ वटा बीमा कम्पनीहरुको पुनर्बीमा व्यवसाय पाउनेछन् । यसले नयाँ सञ्चालनमा आउन लागेको हिमालयन रिको व्यवसाय सुनिश्चित भएको छ भने नेपाल पुनर्बीमा कम्पनीको व्यवसाय भने बढ्ने निश्चत देखिन्छ ।
बीमा समितिको तथ्यांक अनुसार गत आर्थिक वर्षको अन्तिमसम्ममा जीवन बीमा कम्पनीहरुबाट ३ अर्ब ८३ करोड ४२ लाख रुपैयाँ र निर्जीवन बीमा कम्पनीहरुबाट १७ अर्ब १९ करोड रुपैयाँ गरी कुल २१ अर्ब २ करोड ७४ लाख रुपैयाँ भन्दा धेरै रकम पुनर्बीमा वापत विदेशिएको छ ।
समितिको निर्देशनले वार्षिक विदेशिने यस्तै अर्बौ रकम नेपालमै रोकिनेछ । यसले पुनर्बीमा वापत विदेशिने रकम नेपालमै रोकेर मुद्रा संचितीमा समेत योगदान पुग्ने बीमा समितिको भनाई छ ।
हाल नेपाल पुनर्बीमा कम्पनीलाई आठ जीवन बीमा कम्पनीहरुले शतप्रतिशत पुनर्बीमा व्यवसाय दिँदै आएका छन् । गुराँस लाइफ, आइएमई लाइफ, एलआईसी नेपाल, राष्ट्रिय बीमा संस्थान, सानिमा लाइफ, सूर्या लाइफ र सिटिजन लाइफले नेपाल पुनर्बीमामा शतप्रतिशत पुनर्बीमा गराएका छन् ।
यस्तै, नेपाल पुनर्बीमा कम्पनीले फिलिपिन्स, बंगलादेश, भुटान, भारत, पपुवा न्यूगिनी, माल्दिभस्, भियतनाम, टोगो गरी आठ देशबाट व्यवसाय विस्तार गरेको छ ।
नेपाल पुनर्बीमा कम्पनीले गत आर्थिक वर्षको चौथो त्रैमाससम्ममा १ अर्ब १६ करोड ९५ लाख रुपैयाँ खुद नाफा कमाएको छ भने ९ अर्ब ४३ करोड ३ लाख रुपैयाँ खुद बीमाशुल्क आर्जन गरेको छ ।
चुक्ता पूँजी १० अर्ब रुपैयाँ रहेको कम्पनीको जगेडा कोषमा ३ अर्ब ३५ करोड १४ लाख रुपैयाँ र बीमा कोषमा २ अर्ब ४६ करोड ५४ लाख रुपैयाँ सञ्चित छ ।
