भन्सार विभागको पछिल्लो सात महिनाको तथ्याङ्कले इन्धनबाट चल्ने बाइक तथा स्कुटरको बजार निरन्तर गुम्दै गएको देखिएको हो । उपभोक्ताको विद्युतीय स्कुटरमा आकर्षण बढ्दै गएपछि इन्धनबाट चल्ने दुई पाङ्ग्रेको भने आयात घट्दै गएको हो ।
विद्युतीय स्कुटरमा पनि आक्रामक विस्तार नभएपनि अहिले उपभोक्ता इभी मै बढी केन्द्रीत रहेको देखिएको हो । इभीमा उपभोक्ताले रुची देखाएपनि कन्फिडेन्स नदेखिएको व्यवसायी बताउछन् ।
नेपाली बजारमा हालसम्म ३० हजार बढी विद्यूतीय स्कुटर आयात भएको व्यवसायीको आनुमानित तथ्याङ्क छ । इभीमा कन्फिडेन्स बढ्न नसक्ने र इन्धनका दुई पाँग्रे किन्न अरुचीको कारण पछिल्लो समय दुईपाँग्रे बजार कठिन अवस्थामा पुगेको हो ।
भन्सारको तथ्याङ्कअनुसार २०७७/७८ मा ३२ अर्ब १४ करोड रुपैयाँ बराबरको ३ लाख ५३ हजार ६२६ युनिट आयात भएको थियो । यस्तै २०७८/७९ मा उक्त संख्या घटेर २७ अर्ब ६२ करोड ४९ लाख रुपैयाँ बराबरको २ लाख ७८हजार ४८९ युनिट आयात भएको उल्लेख छ ।
यसैगरी २०७९/ ८० मा आइपुग्दा इन्धन दुई पाङ्ग्रेको आयात क्रमिक रुपमा घट्दै आएको छ । सो बर्ष ११ अर्ब बराबरको १ लाख ४ हजार १८६ युनिट इन्धन स्कुटर र बाइक आयात भएका थिए ।
चालु आर्थिक बर्ष २०८०/८१ को सात महिनामा ८ अर्ब १९ करोड रुपैयाँ बराबरको दुईपाँग्रे सवारी आयात भएको छ । माघ महिनासम्म ६९ हजार ९४७ युनिट दुईपाँग्रे सवारी आएको विभागको तथ्याङ्कले देखाएको छ ।
