बाबुकृष्ण महर्जन

पछिल्लो केही कारोबार दिनदेखि हाइड्रोपावरका कम्पनीको शेयर मूल्य बढिरहेको छ। नेप्से घट्दा होस् या बढ्दा, हाइड्रोपावर समूह भने बढ्दो लयमा देखिएको छ ।

कुनै समय ‘लो क्याप’ कम्पनी भन्दै लागेका लगानीकर्ताहरु अहिले विस्तारै त्यस्ता ‘लो क्याप’ कम्पनीको इक्जिट लिएर ‘लक इन पिरियड’ खुल्न लागेका हाइड्रोपावर कम्पनीमा संस्थागत लगानी भएका कम्पनीमा आकर्षित भएको देखिएको छ । पछिल्लो समय राधी विद्युत कम्पनी, सानिमा माई हाइड्रोपावर, बुटवल पावर कम्पनी, युनिभर्सल पावर कम्पनी, चिलिमे हाइड्रोपावर, ङादी ग्रुप पावर, अरुण काबेली पावर जस्ता कम्पनीहरुको शेयर मूल्य निरन्तर बढिरहेका छन् जसले संस्थागत लगानीको रुपमा अन्य हाइड्रोपावरमा लगानी गरेको छ र ती हाइड्रोपावरले आइपीओ जारी गरेर पनि तीन वर्षको लक इन पिरियड सकिने अवस्थामा छन् ।

नेप्सेमा सुचीकृत बैंक तथा वित्तीय संस्था र बीमा कम्पनी बाहेकका कम्पनीहरुको हकमा आइपीओ बाँडफाँड भएको मितिले ३ वर्ष पछि सबै संस्थापक शेयर पनि सर्वसाधारण सरह नै बिक्री गर्न पाइने व्यवस्था रहेको छ । सोही व्यवस्थाका कारण नै अहिले एनआरएन इन्फ्रास्ट्रक्चर, हाथवे इन्भेष्टमेन्ट नेपाल, सीइडीबी होल्डिङ जस्ता लगानी समूहमा रहेका कम्पनीको शेयर मूल्य पनि निरन्तर उकालो लागिरहेको छ । लगानी समूहमा रहेका इन्भेष्टमेन्ट कम्पनीले लगानी गरेका हाइड्रोपावर कम्पनीको लक इन पिरियड सकिन लागेको हुँदा ती शेयर बेचेपछि इन्भेष्टमेन्ट कम्पनीलाई ‘नाफा हुन्छ’ भन्ने हल्लामै अहिले प्रायः लगानी समूह र पुराना हाइड्रोपावर कम्पनीको शेयर मूल्य बढेको लगानीकर्ताहरु बताउँछन् ।

मेरो लगानीले केही लकिङ खुल्न लागेका कम्पनीमा कुन कुन सुचीकृत कम्पनीको लगानी छ, केलाउने प्रयास गरेको छ ।

गएको जेठ ८ गतेबाट रिभर फल्स पावर लिमिटेडको लक इन पिरियड सकियो । यो कम्पनीमा मायाखोला हाइड्रोपावरको १ लाख ६७ हजार १ सय ६६ कित्ता शेयर रहेको छ । सोही आधारमा सोमबार मायाखोला हाइड्रोपावरको शेयर मूल्य सर्किट लेभलमा कारोबार भयो यद्यपि विगत दुई कारोबार दिन पुनः यो कम्पनीको शेयर मूल्य घट्दो क्रममा रहेको छ र बुधबार ४ सय ३२ रुपैयाँ १३ पैसामा अन्तिम कारोबार भयो ।

हालै मात्र १ बराबर १ को अनुपातमा हकप्रद शेयर निष्काशन गरेको दोर्दी खोला हाइड्रोपावर कम्पनीमा राधी विद्युत कम्पनीको १६ लाख ४४ हजार ८ सय ८८ र सीइडीबी होल्डिङसको १ लाख २० हजार कित्ता संस्थापक शेयर रहेको छ । दोर्दीले १ बराबरको १ को अनुपातमा हकप्रद शेयर निष्काशन गरेको हुनाले राधी र सीइडीबीको होल्डिङ दोब्बर हुने अनुमान गर्न सकिन्छ । कम्पनीको लक इन पिरियड असार ७ मा मात्रै सकिंदैछ । दोर्दी खोला हाइड्रोपावरको शेयर बुधबार ३ सय ९१ रुपैयाँ २७ पैसा अन्तिम मूल्य कायम भयो ।

हिमालयन हाइड्रोपावरको लक इन पिरियड आगामी असार २७ मा सकिंदैछ । कम्पनीमा सानिमा बैंकको ५ लाख ६६ हजार ९ सय ९९ कित्ता संस्थापक शेयर रहेको छ ।

अप्पर हेवाखोला हाइड्रोपावर कम्पनीको लक इन पिरियड असार ३१ मा सकिंदैछ । कमपनीमा पिपल्स हाइड्रोपावर कम्पनीको ५ लाख कित्ता संस्थापक शेयर लगानी रहेको छ । पिपल्स हाइड्रोपावर ५ सय ३९ रुपैयाँ ६७ पैसामा र अप्पर हेवा खोलाको शेयर ५ सय ६९ रुपैयाँ ३४ पैसामा बुधबार अन्तिम कारोबार भयो ।

हालै मात्र १ बराबर १ को अनुपातमा हकप्रद शेयर निष्काशन गरेको राप्ती हाइड्रो एन्ड जनरर कन्स्ट्रक्सन लिमिटेडको लक इन पिरियडि साउन ८ गते सकिंदैछ । कम्पनीमा युनिभर्सल पावर कम्पनीको १४ लाख ४२ हजार १ सय ८७ कित्ता, राधी विद्युतको १२ लाख ९० हजार कित्ता, सीइडीबी होल्डिङ्सको १ लाख कित्ता संस्थापक शेयर रहेको छ । १ बराबर १ को अनु्पातमा हकप्रद शेयर निष्काशन गरेको हुँदा यी कम्पनीहरुको अहिलेको शेयर संख्या दोब्बर भइसकेको छ । राप्ती हाइड्रोको शेयर अहिले ३ सय रुपैयाँ भन्दा माथिल्लो मूल्यमै कारोबार भइरहेको छ ।

श्वेतगंगा हाइड्रोपावर एन्ड कन्स्ट्रक्सन लिमिटेडमा सानिमा माई हाइड्रोपावर, सानिमा बैंक र एनआरएन इन्फ्रास्ट्रक्चर एन्ड डेभलपमेन्ट कम्पनीको संस्थापक लगानी रहेको छ । सानिमा हाइड्रोपावरको ४५ लाख कित्ता, सानिमा बैंकको ५ लाख कित्ता र एनआरएनको १० लाख कित्ता शेयर कम्पनीमा रहेको छ । कम्पनीको लक इन पिरियड साउन १७ गते खुल्दैछ ।

त्यसैगरी त्रिशुली जलविद्युत कम्पनी लिमिटेडमा सरकारी स्वामित्वको नेपाल टेलिकमको ७४ लाख १० हजार कित्ता शेयर रहेको छ । सर्वसाधारणलाई जनतालाई प्रारम्भिक चरणमा १० रुपैयाँमा शेयर बेचेको यो कम्पनीको २०८२ फागुन १६ गते लकिङ पिरियड खुल्नेछ ।

यता २०८२ कै माघ २४ मा लकिङ खुल्ने मायाखोला हाइड्रोपावरमा प्रभु इन्स्योरेन्सको ४ लाख ६० हजार कित्ता संस्थापक शेयर लगानी रहेको छ भने २०८२ को फागुन १६ मै लकिङ खुल्ने एसियन हाइड्रोपावरमा सामलिङ पावर कम्पनीको ५० हजार कित्ता संस्थापक शेयर लगानी रहेको छ ।

सानिमा मिडल तमोर हाइड्रोपावरमा सानिमा माई हाइड्रोपावर, एनआरएन इन्फ्रास्ट्रक्चर सानिमा बैंकको संयुक्त लगानी रहेको छ । सानिमा मिडल तमोरमा सानिमा माई हाइड्रोपावरको ५३ लाख ३२ हजार कित्ता, एनआरएनको १२ लाख १ हजार २ सय २५ कित्ता र सानिमा बैंकको ११ लाख १० हजार ८ सय ३३ कित्ता संस्थापक शेयर लगानी रहेको छ । २०८२ को चैत्र ७ गते लकिङ पिरियड सकिने सानिमा मिडिल तमोरको अहिले ५ सय रुपैयाँ भन्दा माथिल्लो मूल्यमा शेयर कारोबार भइरहेको छ ।

सगरमाथा जलविद्युत कम्पनीले हालै मात्र धितोपत्र बोर्डमा १ बराबर १ को अनुपातमा हकप्रद निष्काशन गर्न आवेदन दिएको छ । कम्पनीमा ङादी गु्रप पावरको १४ लाख कित्ता संस्थापक शेयर लगानी रहेको छ । कम्पनीको २०८२ को चैत्र १६ मा मात्रै लकिङ खुल्नेछ । त्यसबेलासम्म कम्पनीले हकप्रद निष्काशन गरिसकेको हुनेछ ।

माथिल्लो मैलुङ खोला जलविद्युत आयोजना पनि आगामी २०२६ सालभित्र लकिङ पिरियड सकिने कम्पनीमा पर्दछ । कम्पनीको २०८३ साउन २६ मात्र लकिङ खुल्नेछ । यसमा सानिमा माई हाइड्रोपावरको २३ लाख ७५ हजार कित्ता, सानिमा बैंकको ३ लाख ७५ हजार कित्ता, मैलुङ खोला जलविद्युत कम्पनीको २ लाख ५९ हजार २ सय ३१ कित्ता र एनआरएनको २ लाख २५ हजार कित्ता शेयर लगानी रहेको छ ।

भिजन लुम्बिनी ऊर्जा कम्पनीमा एचआइडीसीएल, साइन रेसुगा विकास बैंक, सानिमा रिलायन्स लाइफ इन्स्योरेन्स, प्रभु महालक्ष्मी लाइफ इन्स्योरेन्स र सेन्ट्रल फाइनान्सको संस्थापक लगानी रहेको छ । २०८३ को पुस ४ गते लकिङ सकिने यो कम्पनीमा एचआइडीसीएलको २० लाख कित्ता, साइन रेसुङाको ५ लाख, सानिमा रिलाइन्स लाइफको ५ लाख, प्रभु महालक्ष्मी लाइफको २ लाख र सेन्ट्रल फाइनान्सको २ लाख कित्ता संस्थापक शेयर लगानी रहेको छ।