नेपाल स्टक एक्सचेन्ज (नेप्से) मा सोमबार नयाँ मानिएका कम्पनीहरूको शेयरमा लगानीकर्ताको तीव्र आकर्षण देखिएको छ। साताको दोस्रो कारोबार दिन बजार खुलेदेखि नै आक्रामक देखिएका लगानीकर्ताहरूका कारण आधा दर्जन कम्पनीको शेयर मूल्यमा १० प्रतिशतको सकारात्मक सर्किट लागेको हो। 

विशेषगरी जलविद्युत  क्षेत्रका नवप्रवेशी कम्पनीहरूले आजको बजारलाई नेतृत्व गरेका छन्।

आज सर्वाधिक मूल्य बढ्ने सूचीको अग्रस्थानमा सागर डिष्टिलरी रहेको छ, जसको मूल्य प्रतिकित्ता १८३.३० रुपैयाँले बढेर २,०१६.३० रुपैयाँ पुगेको छ। त्यस्तै, एसवाई प्यानलको  मूल्य ११२.१० रुपैयाँले बढेर १,२३३.१० रुपैयाँ पुग्दा श्रीनगर एग्रीटेक इण्डष्ट्रीजको मूल्य पनि ९३.९० रुपैयाँले बढेर १,०३३.३० रुपैयाँ कायम भएको छ। यी  कम्पनीहरूलाई बजारमा पछिल्लो समयका उदाउँदा कम्पनीका रूपमा चिनिन्छ।

अर्कोतर्फ बन्दीपुर केबलकार एण्ड टुरिजमको मूल्य पनि १० प्रतिशतले बढेर ८९८.७० रुपैयाँ पुगेको छ। रु रु जलविद्युतको मूल्यमा ६७ रुपैयाँको वृद्धि भई ७३७ रुपैयाँ पुग्दा बाराही हाइड्रोपावर ९.९८ प्रतिशत र दरमखोला हाइड्रोपावर ९.५४ प्रतिशतले बढेका छन्।

आजको कारोबारमा देखिएको एउटा रोचक पक्ष के छ भने, पुराना र स्थापित ठूला कम्पनीहरू भन्दा पनि पछिल्लो समय नेप्सेमा सूचीकृत भएका नयाँ कम्पनीहरूमा लगानीकर्ताको ध्यान बढी केन्द्रित भएको छ। छोटो समयमै राम्रो नाफा कमाउन सकिने मनोवैज्ञानिक प्रभाव र नयाँ आयोजनाहरूबाट हुने आम्दानीको सम्भावनाले गर्दा लगानीकर्ताहरू यस्ता कम्पनीमा झुम्मिएका हुन्।

दोस्रो बजारमा तरलता सहज हुँदै जाँदा लगानीकर्ताहरूले पुराना 'ब्लू चिप' शेयरहरू भन्दा बढी प्रतिफल दिने सम्भावना भएका नयाँ र 'ग्रोथ' स्टकहरू रोज्न थालेका छन्। १० प्रतिशतको हाराहारीमा मूल्य बढेका यी कम्पनीहरूमा खरिद मागको चाप अझै उच्च रहेकाले आगामी दिनमा पनि यिनीहरूको प्रदर्शन सकारात्मक रहने अपेक्षा गरिएको छ। नयाँ कम्पनीहरूको शेयरमा देखिएको यो चमकले बजारमा नयाँ लगानीकर्ताहरूको प्रवेश र उत्साहलाई थप प्रस्ट पारेको छ।