भ्रष्टाचार विरोधी आन्दोलनको जगमा उभिएर राजनीतिमा उदाएको आम आदमी पार्टी (आप) का लागि दिल्लीको राउज एभिन्यू अदालतको पछिल्लो फैसला पुनर्जन्म साबित भएको छ। 

अदालतले दिल्लीको मदिरा घोटाला प्रकरणमा सीबीआईको अनुसन्धानमाथि फैसला सुनाउँदै पूर्व मुख्यमन्त्री अरविन्द केजरीवाल, पूर्व उपमुख्यमन्त्री मनीष सिसोदिया र अन्य २१ जनालाई पूर्ण रूपमा सफाइ दिएको छ।

भ्रष्टाचारलाई मुख्य मुद्दा बनाएर राजनीतिमा आएको पार्टीका लागि यसअघि लागेका आरोपहरू केवल कानुनी लडाइँ मात्र थिएनन्, यो यसको अस्तित्व र पहिचानको लडाइँ थियो। अदालतको यो फैसलाले पार्टीको धमिलिएको छवि र वरिष्ठ नेतृत्वको राजनीतिक साखलाई पुनः स्थापित गरिदिएको छ।

१७ सेप्टेम्बर २०२४ मा अरविन्द केजरीवालले मुख्यमन्त्री पदबाट राजीनामा दिने घोषणा गर्दा धेरैले यसलाई अनपेक्षित मानेका थिए। दिल्लीको चुनाव नजिकिँदै गर्दा चालिएको उक्त कदमलाई आम आदमी पार्टी र केजरीवालको ‘अग्निपरीक्षा’ का रूपमा हेरिएको थियो। जेलबाट रिहा भए लगत्तै केजरीवालले जनताको अदालतबाट न्याय मागेर पद त्याग्नु एक ठुलो राजनीतिक रणनीतिको हिस्सा थियो। यद्यपि, भारतीय जनता पार्टी (भाजपा) को कडा चुनावी अभियानका कारण पार्टी सत्ताबाट बाहिरिन पुग्यो। भाजपाले ‘आप’ र केजरीवाललाई भ्रष्टाचारको प्रतीकका रूपमा चित्रित गर्दै उनीहरूको नैतिक धरातलमाथि प्रहार गरेको थियो।

दिल्लीका उपराज्यपालको कार्यालयसँगको दैनिक विवादले प्रशासनिक पक्षाघातको कथा बनाए पनि, भाजपाको मुख्य निशाना आप सरकारको नैतिक जग ध्वस्त पार्नु थियो। विद्यालय भवन, अस्पताल निर्माण, पानी आपूर्ति र विद्युत् क्षेत्रमा घोटाला भएको आरोप लगाउँदै भाजपाले ‘आप’ सँग सहर चलाउने सामर्थ्य नरहेको भाष्य निर्माण गरेको थियो।

सत्येन्द्र जैनदेखि मनीष सिसोदिया र अन्ततः केजरीवाल आफै विरुद्ध लागेका आरोपहरूका कारण पार्टीका मुख्य स्तम्भहरू एकपछि अर्को ढल्दै गएका थिए। तर, शुक्रवारको फैसलाले ती सबै आरोपहरूलाई आधारहीन प्रमाणित गरिदिएपछि केजरीवाल र उनको टोलीले फेरि एक पटक शिर उँचो पारेर राजनीतिमा फर्कने अवसर पाएका छन्।

अदालतको यो निर्णयले आफ्नो राष्ट्रिय क्षितिज विस्तार गर्न खोजिरहेको आम आदमी पार्टीलाई थप बल पुर्‍याउनेछ। पन्जाबमा सत्ता जोगाउन सङ्घर्ष गरिरहेको पार्टीका लागि यो फैसला सञ्जीवनी बुटी सरह हुनेछ। अब केजरीवालले दिल्लीमा सङ्गठनलाई सुदृढ पार्दै गोवा जस्ता राज्यहरूमा सरकार परिवर्तनको एजेन्डा लिएर आक्रामक रूपमा प्रस्तुत हुने सम्भावना बढेको छ।

विशेष गरी गुजरातमा, जहाँ केजरीवालले व्यक्तिगत रूपमा भाजपाकै शैलीको सङ्गठनात्मक आधार तयार पारेका छन्। त्यहाँ पार्टीले ठुलो सफलता हात पार्ने अपेक्षा गरिएको छ। पार्टी स्रोतका अनुसार केजरीवालको सक्रियताले गुजरातको राजनीतिक समीकरणमा ठुलो प्रभाव पार्नेछ।

राष्ट्रिय राजनीतिमा ‘इन्डिया ब्लक’का घटक दलहरूबिच कतिपय मुद्दामा काङ्ग्रेससँग मतभेद रहँदै आएको छ। अब केजरीवाल र सिसोदिया दोषमुक्त भएर सक्रिय राजनीतिमा फर्किएसँगै गठबन्धनभित्र आम आदमी पार्टीको मोलतोल गर्ने शक्ति अझ बढ्नेछ। यसले केवल दिल्ली मात्र होइन, भारतको समग्र राष्ट्रिय राजनीतिमा आम आदमी पार्टीको स्थितिलाई थप सुदृढ बनाउने देखिन्छ।