फिफा विश्वकप २०२६ को अन्तिम क्वाटरफाइनल खेलमा साविक विजेता अर्जेन्टिनाले स्विट्जरल्याण्डको कडा चुनौतीलाई अतिरिक्त समयमा ३–१ गोल अन्तरले पन्छाउँदै सेमिफाइनलमा आफ्नो स्थान सुरक्षित गरेको छ।

कान्सास सिटी स्टेडियममा आइतबार बिहान खेलिएको यो खेल निर्धारित ९० मिनेटसम्म १–१ को रोमाञ्चक बराबरीमा सकिएपछि अतिरिक्त समयतर्फ धकेलिएको थियो। १० खेलाडीमा सीमित भएको स्वीस टोलीको बलियो रक्षापङ्क्तिलाई अतिरिक्त समयको अन्तिम १५ मिनेटमा तोड्दै अर्जेन्टिनाले सानदार जित दर्ता गर्‍यो। अब सेमिफाइनलमा अर्जेन्टिनाले आगामी बुधबार एटलान्टामा इङ्गल्याण्डको सामना गर्नेछ।

खेलको १०औँ मिनेटमै अर्जेन्टिनाले उत्कृष्ट सुरुवात गर्‍यो। कप्तान लियोनेल मेसीको सानदार कर्नर क्रस पासमा मिडफिल्डर अलेक्सिस म्याक एलिस्टरले उत्कृष्ट हेडिङ गोल गर्दै अर्जेन्टिनालाई १–० को अग्रता दिलाए।

एक गोलले पछि परे पनि स्वीस टोलीले हार मानेन। ६७औँ मिनेटमा रिकार्डो रोड्रीग्वेजको चलाखीपूर्ण पासमा ड्यान एनडोयेले अर्जेन्टिनी गोलकिपर एमिलियानो मार्टिनेजलाई बिट गर्दै बललाई नेटको जाली चुमाए र खेल १–१ को बराबरीमा ल्याए।

खेलको ७२औँ मिनेटमा एक ठूलो नाटकीय मोड आयो। सुरुमा रेफ्रीले अर्जेन्टिनाका लियान्द्रो परेदेसलाई पहेंलो कार्ड देखाएका थिए। तर भिएआरको ‘मिस्टेकन आइडेन्टिटी’ र रिप्ले चेक गर्दा स्वीस स्ट्राइकर ब्रील एमबोलोले सिमुलेसन (झूटो फलको अभिनय) गरेको देखियो। एमबोलोले पहिले नै एक पहेंलो कार्ड खाइसकेकाले उनलाई दोस्रो पहेंलो कार्डसँगै रातो कार्ड देखाउँदै मैदानबाट बाहिर पठाइयो र स्विट्जरल्याण्ड १० खेलाडीमा सीमित बन्यो।

१० खेलाडी विरुद्ध अर्जेन्टिनाले लगातार दबाब बुन्यो। अन्ततः ११२औँ मिनेटमा युवा स्टार जुलियान अल्भारेजले डिबक्स भित्रबाट सानदार प्रहार गर्दै अर्जेन्टिनालाई २–१ को निर्णायक अग्रता दिलाए। खेलको अन्तिम मिनेट (१२०औँ मिनेट) मा काउन्टर अट्याकमा लाउतारो मार्टिनेजले अर्को एक गोल थप्दै अर्जेन्टिनाको ३–१ को सानदार जित पक्का गरे।

स्विट्जरल्याण्डलाई पाखा लगाउँदै सेमिफाइनलमा पुगेको अर्जेन्टिनाले अब फाइनल प्रवेशका लागि फुटबल इतिहासकै सबैभन्दा ठूलो प्रतिद्वन्द्वी इङ्गल्याण्डको सामना गर्नेछ। थोमस टुचेलको इङ्गल्याण्डले यस अघि नै नर्वेलाई २–१ ले हराएर सेमिफाइनल यात्रा तय गरिसकेको छ। मेसी र जुड बेलिङ्घम बीचको यो सेमिफाइनल भिडन्त यस विश्वकपकै सबैभन्दा रोमाञ्चक खेल हुने निश्चित छ।