भारतका दुई ठूला स्वदेशी अटोमोबाइल निर्माता कम्पनीहरू टाटा मोटर्स र महिन्द्रा एण्ड महिन्द्राले तीनवटा नयाँ मोडलका एसयूभी सार्वजनिक गर्ने भएका छन् ।

अत्यधिक प्रतिस्पर्धात्मक मानिने ४ मिटरभन्दा कम लम्बाइका (सब फोर मिटर) एसयूभी खण्डमा हाल टाटाले ‘नेक्सन’ र ‘पञ्च’ बिक्री गरिरहेको छ, जसमा इन्धन र विद्युतीय दुवै विकल्प उपलब्ध छन्। अर्कोतर्फ, महिन्द्राको पोर्टफोलियोमा एक्सयूभी ३एक्सओ र ‘बोलेरो नियो’ जस्ता गाडीहरू लोकप्रिय छन्।

बजारमा आफ्नो पकड अझ बलियो बनाउन यी दुवै कम्पनीले सन् २०२६-२०२७ सम्ममा तीनवटा नयाँ मोडलहरू महिन्द्रा भिजन एस, टाटा स्कार्लेट र नयाँ पुस्ताको टाटा नेक्सन बजारमा ल्याउने भएका छन्।

१. महिन्द्रा भिजन एस

महिन्द्राको ‘भिजन एस’ यसको कन्सेप्ट मोडल जस्तै आकर्षक र मजबुत हुने अपेक्षा गरिएको छ। यसमा ‘बक्सी बनावट’ नयाँ ६-स्लेट ग्रिल, आधुनिक एलईडी हेडल्याम्प, प्यानोरामिक सनरुफ र फ्लस डोर ह्यान्डल जस्ता विशेषताहरू रहनेछन्।

यो एसयूभी महिन्द्राको नयाँ 'NU_IQ' मोड्युलर प्लेटफर्ममा आधारित पहिलो मोडल हुनेछ। यो प्लेटफर्मले पेट्रोल तथा डिजेल, इलेक्ट्रिक र हाइब्रिड तीनै प्रकारका इन्जिनलाई सपोर्ट गर्दछ। यो गाडी २०२६ को अन्त्य वा २०२७ को सुरुमा सार्वजनिक हुने अनुमान गरिएको छ।

२. टाटा स्कार्लेट

टाटा मोटर्सले ‘स्कार्लेट’ कोडनेममा एउटा नयाँ सब–४ मिटर एसयूभी विकास गरिरहेको छ। यो गाडी मोनोकक चेसिसमा आधारित हुनेछ र यसको डिजाइन टाटाको चर्चित मोडल ‘सिएरा’ सँग मिल्दोजुल्दो हुने बताइएको छ।

३. नयाँ पुस्ताको टाटा नेक्सन

टाटाले आफ्नो सबैभन्दा बढी बिक्री हुने एसयूभी ‘नेक्सन’ लाई पूर्ण रूपमा नयाँ अवतारमा ल्याउँदैछ। नयाँ पुस्ताको नेक्सन नयाँ प्लेटफर्ममा निर्माण हुनेछ र यसको बनावटमा पनि ठूलो परिवर्तन गरिनेछ। नयाँ डिजाइन, अझ बढी विलासी इन्टेरियर र अत्याधुनिक सुविधाहरू थपिए पनि इन्जिनका विकल्पहरू भने हालकै पेट्रोल र डिजेल रहने अपेक्षा गरिएको छ।

यी नयाँ मोडलहरूको आगमनसँगै आगामी वर्षहरूमा एसयूभी बजारमा प्रतिस्पर्धा अझै रोचक र तीव्र हुने देखिएको छ।