प्रधानमन्त्री तथा मन्त्रिपरिषद्को कार्यालयमा भएको भेटमा सांसदहरूले सुदूरपश्चिमको समग्र विकास, राजनीतिक अवस्था र स्थानीय समस्याबारे प्रधानमन्त्रीको ध्यानाकर्षण गराए।
भेटका क्रममा सांसदहरूले सरकारले सुशासनका क्षेत्रमा गरेका कामको प्रशंसा गरे। ती उपलब्धिबारे संसदमार्फत जनतालाई जानकारी गराउने प्रतिबद्धता व्यक्त गर्दै उनीहरूले आफ्ना निर्वाचन क्षेत्रसँग सम्बन्धित विभिन्न विकास आयोजना र समस्याबारे प्रधानमन्त्रीलाई जानकारी दिए।
सांसदहरूले सुदूरपश्चिमका ठुला आयोजना र वर्षौँदेखि अल्झिएका विषयमा विशेष जोड दिए। उनीहरूले गेटा विश्वविद्यालय सञ्चालन, पश्चिम सेती जलविद्युत् आयोजना र पञ्चेश्वर बहुउद्देश्यीय आयोजनालाई गति दिन माग गरे। त्यस्तै, धनगढी–खुटिया–दिपायल फास्ट ट्र्याक, कैलाली र कञ्चनपुरका तराई क्षेत्रमा रहेको छाडा चौपाया व्यवस्थापन, विद्युतीकरण, सडक दुर्घटना न्यूनीकरण र तटबन्ध निर्माणका विषयमा पनि उनीहरूले प्रधानमन्त्रीसमक्ष कुरा राखे।
सांसदहरूले दोधारा–चाँदनी क्षेत्रमा भइरहेको नदी कटान, भन्सारमा देखिएका समस्या, आरक्ष पीडितका गुनासो र हुलाकी सडकको सुस्त निर्माणबारे पनि ध्यानाकर्षण गराए। साथै, किसानले धान खरिद–बिक्रीमा भोग्नुपरेको समस्या समाधान गर्न उनीहरूले आग्रह गरे।
भेटमा रास्वपाका सांसदहरू ताराप्रसाद जोशी, खेमराज कोइराला, हरिमोहन भण्डारी, जनकसिंह धामी, कोमल ज्ञवाली, ज्ञानेन्द्र महता, जगत जोशी र केपी खनाल लगायतको सहभागिता थियो। प्रधानमन्त्री बालेनले सांसदहरूले उठाएका विषयलाई गम्भीरतापूर्वक लिँदै आवश्यक पहल गर्ने आश्वासन दिए।
