बाढी पूर्वानुमान महाशाखाका अनुसार जलसतह अझै बढ्दो क्रममा रहेकाले त्रिशूली नदी आसपासका बासिन्दालाई उच्च सतर्कता अपनाउन आग्रह गरिएको छ। नदीको बहाव बढ्दै गएपछि तटीय क्षेत्र र डुबानको जोखिम रहेका स्थानमा थप क्षति हुन सक्ने चेतावनी दिइएको छ।
महाशाखाले भदौ १० गते बिहान ११ः४३ बजे चेतावनी जारी गर्दै रसुवाको भोटेकोशीमा आएको बाढीको प्रभाव त्रिशूली नदीमा परेको जनाएको हो।
जोखिमयुक्त क्षेत्रका नागरिकलाई नदी किनार र आसपासका स्थानमा नजान तथा आवश्यक परे तत्काल सुरक्षित स्थानमा सर्न आग्रह गरिएको छ। स्थानीय प्रशासन र सुरक्षा निकायले दिएका सूचना तथा निर्देशनलाई पालना गर्न पनि महाशाखाले अनुरोध गरेको छ।
त्रिशूलीको जलसतह निरन्तर निगरानीमा राखिएको छ भने नदीको बहाव थप बढ्न सक्ने भएकाले तल्लो तटीय क्षेत्रका नागरिकलाई सतर्क रहन आग्रह गरिएको छ।
