कम्पनीले नयाँ थारको टिजर सार्वजनिक गर्दै आगामी सेप्टेम्बर २२ मा औपचारिक रूपमा सार्वजनिक गर्ने मिति तय गरेको हो । नयाँ थारमा कम्पनीले थार रक्सबाट प्रभावित डिजाइनसहित केही नयाँ फिचर थप गर्ने तयारी गरेको छ ।
कम्पनीले सार्वजनिक गरेको टिजरमा नयाँ थारको अगाडिको डिजाइनमा उल्लेख्य परिवर्तन देखिन्छ । एसयूभीमा नयाँ म्यास ग्रिल राखिएको छ भने त्यसमा महिन्द्राको लेटरिङ देखिन्छ । यस्तै, नयाँ बम्पर, परिमार्जित हेडलाइट र अफरोडका लागि उपयुक्त मड टेरेन टायर प्रयोग गरिएको देखिन्छ ।
नयाँ थारको डिजाइनमा थार रक्सको प्रभाव विशेष रूपमा देखिनेछ । गोलाकार प्रोजेक्टर एलईडी हेडलाइटसँगै सी–आकारको डीआरएल, परिमार्जित एलईडी टेललाइट र नयाँ बम्पर यसमा समावेश हुने अपेक्षा गरिएको छ । यी परिवर्तनले हालको मोडलको तुलनामा नयाँ थारलाई थप आकर्षक र आक्रामक स्वरूप दिने अनुमान गरिएको छ ।
फेसलिफ्ट थारको इन्टेरियरमा पनि केही महत्त्वपूर्ण सुधार गरिने अपेक्षा गरिएको छ । यसमा डिजिटल इन्स्ट्रुमेन्ट क्लस्टर, अटोमेटिक क्लाइमेट कन्ट्रोल, भेन्टिलेटेड फ्रन्ट सिट र ३६० डिग्री क्यामेरा जस्ता सुविधा थपिने बताइएको छ ।
हालको मोडलमा उपलब्ध १०.२५ इन्चको टचस्क्रिन इन्फोटेनमेन्ट सिस्टमलाई भने निरन्तरता दिइनेछ । त्यस्तै, इलेक्ट्रोनिक रूपमा एडजस्ट गर्न मिल्ने ओआरभीएम, ६–स्पिकर साउन्ड सिस्टम, वायरलेस एन्ड्रोइड अटो तथा एप्पल कारप्ले पनि नयाँ मोडलमा रहने अपेक्षा गरिएको छ ।
सुरक्षाका लागि इलेक्ट्रोनिक स्टेबिलिटी प्रोग्राम, टायर प्रेसर मोनिटरिङ सिस्टम र रियर पार्किङ सेन्सरलगायतका सुविधा उपलब्ध हुनेछन् । नयाँ ३६० डिग्री क्यामेराले पार्किङ तथा कठिन भूभागमा सवारी सञ्चालन गर्दा चालकलाई थप सहयोग गर्ने अपेक्षा गरिएको छ ।
इन्जिनमा भने ठूलो परिवर्तन नहुने अनुमान गरिएको छ । नयाँ थारमा १.५ लिटर डिजेल इन्जिनले ११९ बीएचपी, २.२ लिटर डिजेल इन्जिनले १३२ बीएचपी तथा २.० लिटर टर्बो पेट्रोल इन्जिनले १५२ बीएचपी शक्ति उत्पादन गर्ने विकल्पलाई निरन्तरता दिने अपेक्षा गरिएको छ ।
गियरबक्सतर्फ ६–स्पिड म्यानुअल ट्रान्समिसन सबै इन्जिनमा उपलब्ध हुने बताइएको छ । ६–स्पिड टर्क कन्भर्टर अटोमेटिक गियरबक्स भने २.२ लिटर डिजेल र २.० लिटर टर्बो पेट्रोल इन्जिनमा मात्र उपलब्ध हुने अपेक्षा गरिएको छ । नयाँ थारमा रियर ह्विल ड्राइभ र अल ह्विल ड्राइभ दुवै विकल्प रहनेछन् ।
मूल्यका विषयमा महिन्द्राले औपचारिक जानकारी सार्वजनिक गरिसकेको छैन । यद्यपि, नयाँ फिचर र डिजाइनमा गरिएको सुधारका कारण यसको मूल्य हालको मोडलको तुलनामा केही बढी हुने अनुमान गरिएको छ । भारतमा हाल थारको एक्स–शोरुम मूल्य १०.३२ लाखदेखि १८ लाख भारुसम्म रहेको छ ।
सेप्टेम्बर २२ मा सार्वजनिक भएपछि नयाँ थारको भेरियन्ट, मूल्य, बुकिङ तथा अन्य प्राविधिक विवरण स्पष्ट हुनेछन् । थार रक्सबाट प्रभावित डिजाइन र थप सुविधासहित आउन लागेको नयाँ ३–डोर थारले महिन्द्राको अफरोड एसयूभी लाइनअपलाई थप विस्तार गर्नेछ ।
