राष्ट्र बैंकको अनुसार सात प्रदेश मध्ये प्रदेश ५ र गण्डकी प्रदेशको सबै स्थानीय तहमा शाखा विस्तार भएको छ । यस्तै प्रदेश १ र कर्णाली प्रदेशमा १/१ शाखा विस्तार गर्न बाँकी छ । यस्तै प्रदेश २ र प्रदेश ३ को २ स्थानीय तहमा अझै वाणिज्य बैंक पुग्न सकेको छैन । सुदूरपश्चिम प्रदेशको ५ स्थानीय तहमा अझै बैकिङ्ग पहुँच पुग्न बाँकी छ ।
नेपाल राष्ट्र बैंकबाट इजाजत प्राप्त बैंक तथा वित्तीय संस्थाहरुको संख्या कार्तिकसम्ममा १६७ पुगेको छ । त्यसमा २८ वाणिज्य बैंक, २५ विकास बैंक, २२ वित्त कम्पनी, ९१ लघुवित्त वित्तीय संस्था र एक पूर्वाधार विकास बैंक रहेका छन् ।
बैंक तथा वित्तीय संस्थाको शाखा संख्या २०७६ असार मसान्तमा ८ हजार ६८६ रहेकोमा २०७६ कार्तिक मसान्तमा ९ हजार २२३ वटा पुगेको हो ।
यस्तै वाणिज्य बैंकको ३ हजार ९३५, विकास बैंकको १ हजार २७३, वित्त कम्पनीको २२० र लघुवित्त वित्तीय संस्थाको ३ हजार ७९५ गरी ९ हजार २२३ वटा शाखा पुगेको राष्ट्र बैंकले जनाएको छ ।
यस अवधिमा कुल १७८ वटा बैंक तथा वित्तीय संस्थाहरु मर्जर तथा प्राप्ति प्रकृयामा सामेल भएका छन् । त्यस मध्ये १३५ वटा संस्थाहरुको इजाजत खारेज हुन गई ४३ संस्था कायम रहेको राष्ट्र बैंकको प्रतिबेदनमा उल्लेख छ ।
