नेपालीहरुको महान पर्व दशैं मान्न गाउँ जानेहरुका लागि असोज पहिलो सातादेखि टिकट बुकिङ खुल्ने भएको हो ।
खासगरी, काठमाडौं उपत्यकामा विभिन्न पेशा, व्यवसाय गरेको व्यक्तिहरु दशैं मान्न गाउँ जाने गरेका छन् । दशैंका बेला यात्रुहरुको भीडभाड हुने हुँदा सरकारले हरेक वर्ष अग्रिम रुपमा टिकट बुकिङ खुलाउने गरेको छ ।
यसपालीको बिजयादशमी आगामी असोज १६ गते परेको छ । यसपाली दशैंका लागि अग्रिम टिकट बुकिङ असोज पहिलो सातादेखि खुल्ने राष्ट्रिय यातायात व्यवसायी महासंघका वरिष्ठ उपाध्यक्ष सरोज सिटौलाले मेरो लगानीलाई बताए ।
‘अहिले नै छलफल गरेका छैनौं । तथापी, असोज ५-६ गतेसम्म त बुकिङ खुलिसक्छ,’ उनले भने, ‘यसवर्ष पनि यात्रुले टिकट पाइन भन्ने अवस्था रहँदैन् । शुरक्षित साथ यात्रुलाई गन्तव्यमा पुर्याउँछौं ।’
हरेक वर्ष काठमाडौं उपत्यकाबाट २५ लाखभन्दा बढी यात्रुहरु दशैंका बेला गाउँ पुग्ने गरेका छन् ।
