विवादका बीच ट्रम्पले मंगलबार फेडरल रिजर्भका एक जना गभर्नर लिसा कुकलाई तत्कालै राजीनामा दिन आदेश दिएका छन् । त्यस बारेमा कुकको औपचारिक प्रतिकृया सार्वजनिक नभए पनि उनले पहिले नै ‘सक्ने भए हटाएर देखाउ’ भन्ने आशयको प्रतिकृया दिइसकेकी छन् । त्यसले गर्दा राजीनामा दिन ट्रम्पले दिएको पछिल्लो आदेशलाई पनि उनले अस्वीकार गर्ने निश्चित नै रहेको बताइएको छ ।
कुक फेडरल रिजर्भको गभर्नर बोर्डका सात सदस्यहरूमध्ये एक हुन् र यो पदमा पुग्ने पहिलो अस्वेत अमेरिकी महिला हुन् । सन् २०२२ मा तत्कालिन राष्ट्रपति जो वाइडेनले नियुक्त गरेकी कुक एउटा धितो मूल्याँकनको विषयमा विवादमा परेकी छन् । त्यसैलाई निहुँ बनाएर ट्रम्प उनी विरुद्ध निरन्तर आक्रामक बनिरहेका छन् ।
कतिपय जानकारहरु भने ट्रम्पले फेडेरल रिजर्भका अध्यक्ष जेरोम पावेललाई हटाउने प्रयास असफल भएपछि कुक माथिको आक्रमणलाई तीब्र बनाएको दावी गर्छन् । गत जनवरीमा आफू दोस्रो पटक राष्ट्रपति भएदेखि नै ट्रम्पले पावेललाई पनि पटक पटक राजीनामा दिन दबाब दिँदै आएका थिए, तर पावेलले नटेरेपछि केही समय अघि फेडेरल रिजर्भको भ्रमण गरेर मिलेर काम गर्ने बताएका थिए ।
त्यसपछि पावेलको बारेमा कुनै टिप्पणी नगरेका ट्रम्पले उनका अति निकट मानिएकी कुकमाथि राजीनामा दिन दबाब दिँदै आइरहेका छन् । कुकले भने आफूले कुनै गलत काम नगरेको दावी गर्दै आरोप प्रमाणित गर्न र आफूलाई हटाएर देखाउन ट्रम्पलाई चुनौति दिँदै आएकी छन् ।
फेडेरल रिजर्भका अध्यक्ष पावेलसहित ५ जना सदस्य (त्यहाँ गभर्नर भनिन्छ) मध्ये हाल ट्रम्पको पक्षमा केवल एक जना माइकल बार मात्र छन् । अन्य ५ जना उनको विरोधमा छन् । त्यहीकारण ट्रम्पले अर्थतन्त्रका कतिपय पक्षहरुलाई आफू खुसी निर्णय गर्न र लागू गर्न सकिरहेका छैनन् । खासगरि ब्याजदरको विषयमा उनीहरु बीच विवाद रहेको छ ।
